Նոյեմբերի 26-ին Պակիստանի անցակետի վրա հասցված ՆԱՏՕ-ի հարվածները նախապես ծրագրված են եղել: Այս մասին, ինչպես հաղորդում է Reuters գործակալությունը, հայտարարել է Պակիստանի զինված ուժերի ռազմական գործողությունների գեներալ մայոր Աշֆակ Նադիմը:
Նադիմի ելույթը մեծ իրարանցում է առաջացրել պակիստանյան թերթերի շրջանում: Նշվում է, որ գեներալը տեղի ունեցածն անվանել է Պակիստանի դեմ «նախապես ծրագրված դավադրություն»:
Գեներալն ավելացրել է, որ Պակիստանի «թվացյալ դաշնակիցը» (ԱՄՆ) միանգամայն ունակ է նոր հարվածներ հասցնելու: Նադիմի խոսքերով՝ Պակիստանի զինվորական հրամանատարությունը պատրաստվում է երկրի սահմանի մոտ տեղադրել հակաօդային պաշտպանության համակարգ՝ ապագայում նման միջադեպերը կանխելու համար:
ՆԱՏՕ-ի ռազմական ուղղաթիռները նոյեմբերի 26-ին հարված հասցրին Աֆղանստանի սահմանի մոտ տեղակայված պակիստանյան անցակերտի վրա, որի հետևանքով զոհվեց 24, վիրավորվեց ավելի քան 10 պակիստանցի զինծառայող: ԱՄՆ-ը, ՆԱՏՕ-ն և Աֆղանստանի անվտանգության համագործակցության ուժերը (ISAF) բացատրեցին, թե տեղի ունեցածը սխալմունք է եղել: Պաշտոնական Վաշինգտոնը ներողություն խնդրեցՊակիստանից և խոստացավ հետաքննություն անցկացնել միջադեպի հանգամանքները պարզելու համար:
Միջադեպից հետո երկու երկրների հարաբերությունները խիստ վատացել են: Նոյեմբերի 26-ին Պակիստանը փակեց դեպի Աֆղանստան ՆԱՏՕ-ի մատակարարումների ճանապարհը: Բացի այդ, դաշինքը Պակիստանի պահանջով ստիպված էր ազատեղ Բելուջիստանում տեղակայված ավիաբազան: Դրան ի պատասխան՝ որոշ ամերիկացի քաղաքական գործիչներ, այդ թվում՝ սենատոր Ջոն Մաքքեյնը, կոչ արեցին ամբողջությամբ վերանայել Պակիստանի և ԱՄՆ-ի հարաբերությունները:
