Ռուսական Regnum լրատվական գործակալության փոխանցմամբ՝ Կարնեգիի հիմնադրամի՝ Կովկասի հարցերով փորձագետ Թոմաս դե Վաալը «Ազադլըղ» ռադիոկայանին տված հարցազրույցում անդրադարձել է Ղարաբաղյան հակամարտության կարգավորմանը.
«Ոչ ոք լրջորեն չի դիտարկում առաջիկա երկու տարիներին ուժային ճանապարհով Ղարաբաղյան հակամարտության կարգավորման հավանականությունը, քանի որ դա աղետալի հետևանքներ կունենա բոլորի համար։
Ինչ վերաբերում է հակամարտության կարգավորման վրա ՄԱԿ ԱԽ-ին Ադրբեջանի ոչ մշտական անդամակցության հնարավոր ազդեցությանը, ապա այդ անդամակցությունը կարող է որոշակիորեն ուժեղացնել Բաքվի դիրքերը, քանի որ նա ստանում է ևս մեկ հարթակ՝ Ղարաբաղյան հիմնախնդրի արծարծման համար։
Բայց քանի որ ԵԱՀԿ Մինսկի խմբի համանախագահող երկրները (Ֆրանսիա, ԱՄՆ, Ռուսաստան) հանդիսանում են ՄԱԿ ԱԽ մշտական անդամներ, ուստիև նրանք կարող են վետո դնել Ղարաբաղյան հակամարտության կարգավորման գործընթացում ցանկացած փոփոխության վրա»։
Հիշեցնենք, որ այս տարվա նոյեմբերի կեսերին էլ Վաալը հայտարարել էր. «Լեռնային Ղարաբաղի ու Ադրբեջանի միջև ռազմական գործողությունների վերսկսման հավանականությունը շատ փոքր է։ Այս տարվա հուլիսին ես այցելեցի Բաքու, և Կազանի հանդիպումից հետո նրա արձագանքն այնպիսին էր, որ նրանք չեն ցանկանում պատերազմ։
Ադրբեջանը զենքի վրա գումարներ է վատնում ոչ թե պատերազմ մղելու, այլ նրա համար, որպեսզի Հայաստանին ստիպեն ներքաշվել սպառազինությունների մրցավազքի մեջ և արդյունքում սնանկանալ։ Կարծում եմ, որ Ադրբեջանը պատրանքների մեջ է։ Չեմ կարծում, որ Հայաստանը ստիպված կլինի Ղարաբաղը զիջել Ադրբեջանին։ Հայաստանը Ղարաբաղի պաշտպանության համար կանի իր ուժերի սահմաններում ամեն ինչ»։