Հայոց ցեղասպանության վերաբերյալ թիվ 252 բանաձևը չի մտել ԱՄՆ Կոնգրեսի Ներկայացուցիչների պալատի լիագումար նիստի օրակարգ։ Այս մասին տեղեկացնում են թուրքական լրատվամիջոցները՝ վկայակոչելով վաշինգտոնյան աղբյուրները։
Թուրքական Anadolu-ն իր հերթին հայտնում է, որ Կոնգրեսի աշխատանքները երկարաձգվել են, և Հայոց ցեղասպանության բանաձևի հետ կապված «ճգնաժամը» հետաձգվել է ընդամենը մի քանի օրով՝ մինչև դեկտեմբերի 21-ը։ Այն բանից հետո, երբ երեկ տեղեկություն է տարածվել, որ ԱՄՆ Կոնգրեսի Ներկայացուցիչների պալատի խոսնակ Նենսի Փելոսին առաջիկա 48 ժամվա ընթացքում պատրաստվում է Հայոց ցեղասպանության վերաբերյալ թիվ 252 բանաձևն ընդգրկել Կոնգրեսի լիագումար նիստի օրակարգում, Թուրքիայի դիվանագիտական կորպուսում իրարանցում է առաջացել։ Նախ արձագանքել է Վաշինգտոնում Թուրքիայի դեսպան Նամըք Թանը, ով Twitter սոցիալական ցանցի միջոցով տարածած հաղորդագրությամբ վստահություն էր հայտնել, թե Ամերիկայի թուրք համայնքն այդ ամենին կարձագանքի հավուր պատշաճի։ «Հայակական կազմակերպություններն արշավ են սկսել 1915թ. իրադարձությունների հետ կապված բանաձևը Ներկայացուցիչների պալատում քվեարկության դնելու համար։ Վստահ եմ, որ ԱՄՆ-ի թուրք հանրությունը կարձագանքի հավուր պատշաճի»,- նշվել է Թանի հաղորդագրության մեջ։
Այնուհետեւ ԱՄՆ պետքարտուղար Հիլարի Քլինթոնին է զանգահարել Թուրքիայի արտգործնախարար Ահմեդ Դավութօղլուն՝ խնդրելով նրան միջամտել և կանխել Ցեղասպանության բանաձևի հնարավոր ընդունումը։ ԱՄՆ պետքարտուղարը Դավութօղլուին վստահեցրել է, որ Հայոց ցեղասպանության հարցի առնչությամբ Վաշինգտոնի դիրքորոշումն անփոփոխ է և խոստացել անել հնրավորինը` Ներկայացուցիչների պալատում բանաձևի ընդունումը կանխելու համար։
