Ճապոնիան մտադիր է Ֆուկուսիմա-1 ԱԷԿ-ից Խաղաղ օվկիանոս արտամղել տասնյակ հազարավոր տոննա ռադիոակտիվ ջուր: Այս մասին հայտարարել է ԱԷԿ-ի օպերատոր TEPCO ընկերության ներկայացուցիչ Դզյունիտի Մացումոտոն:
«Մենք կցանկանայինք ավելացնել պահեստներ Ֆուկուսիմա-1-ում ջրի պահպանման համար, սակայն դա անհնար է անդադար անել»,- հայտարարել է Մացումոտոն:
Ինչպես հաղորդում է Интерфакс գործակալությունը, ընկերությունում հայտնել են, որ TEPCO-ի ղեկավարությունը դեռևս գնահատում է այդ քայլից բխող պոտենցիալ բնապահպանական վնասը: Սակայն ընկերության գնահատականներով, եթե նույնիսկ այդ միջոցն անխուսափելի լինի, դժվար թե շրջակա միջավայրին հասցվի հսկայական վնաս:
Ընկերությունը ապրիլին ստիպված էր օվկիանոս բաց թողնել ոչ մեծ քանակությամբ ռադիացիա պարունակող տասնյակ հազարավոր տոննա ջուր, որը ուժեղ քննադատության արժանացավ հարևան Հարավային Կորեայի և Չինաստանի կողմից: Սպասվում է, որ այս անգամ նրանց ռեակցիան ավելի սուր կլինի:
Ձկնորսության արդյունաբերության ներկայացուցիչները արդեն իրենց բողոքն են արտահայտել այդ քայլի դեմ:
Հիշեցնենք, որ ընթացիկ շաբաթվա սկզբին Ֆուկուսիմա-1 ԱԷԿ-ի աշխատակիցները հայտնաբերել էին 45 տոննա ռադիոակտիվ ջրի արտահոսք: Այն նկատվել է այն շենքում, որտեղ տեղակայված են ռադիացիայից մաքրազերծելու համար նախատեսված սարքավորումները:
Հիշեցնենք, որ 2011 թվականի մարտի 11-ին Ճապոնիայում տեղի ունեցած երկրաշարժի և ցունամիի հետևանքով Ֆուկուսիմա-1 ԱԷԿ-ի սառեցման համակարգում տեղի ունեցած վթարի պատճառով պայթյուն էր տեղի ունեցել առաջին, երկրորդ և երրորդ էներգաբլոկներում, ավելի ուշ նաև չորրորդ էներգաբլոկում: Ռադիացիայի արտահոսքի պատճառով տարհանվել էր բնակչությունը: Իշխանությունները ավելի վաղ հայտնել էին, որ Ֆուկուսիմայում գրունտային հողերի վարակազերծումը տևելու է 30 տարի: