Երևանի քաղաքապետարանի տեղեկատվության և
հասարակայնության հետ կապերի վարչությունից «Առաջին լրատվական»-ին տղեկացնում են, որ Երևանի քաղաքապետ Տարոն Մարգարյանը հանդիպել է Հայաստանում Իտալիայի արտակարգ և լիազոր դեսպան Բրունո Սկապինիի հետ։
Շնորհակալություն հայտնելով ջերմ ընդունելության համար՝ դեսպան Սկապինին շնորհավորել է Տարոն Մարգարյանին Երևանի քաղաքապետի պատասխանատու պաշտոնում ընտրվելու կապակցությամբ։
Ողջունելով դեսպանին և շնորհակալություն հայտնելով շնորհավորանքի ու բարեմաղթանքների համար, Տարոն Մարգարյանն ընդգծել է հայ –իտալական հարաբերությունների ներկա բարձր մակարդակը։
Խոսելով Երևանի և իտալական քաղաքների միջև ձևավորված բարեկամական հարաբերությունների մասին, Տարոն Մարգարյանը կարևորել է այդ հարաբերությունների ընդլայնման և առավել գործնական հիմքերի վրա դնելու, իտալական այլ քաղաքների հետ նույնպես գործընկերային հարաբերությունների ձևավորման հեռանկարները։ Այս համատեքստում քաղաքապետն առանձնացրել է առաջիկայում Հայաստանի Հանրապետության նախագահի Իտալիա կատարելիք այցի շրջանակում Վենետիկի քաղաքապետի հետ երկու քաղաքների համագործակցության և Երևանն ու Վենետիկը քույր քաղաքներ հռչակելու վերաբերյալ արձանագրության ստորագրումը. «Քաղաքապետարանը ակնկալում է նաև Ձեր և Իտալիայում Հայաստանի հանրապետության դեսպանի աջակցությունը գործընկերային կապերի հաստատման, քաղաքային տնտեսության կառավարման ոլորտներում փորձի փոխանակման, մասնագետների վերապատրաստման, տարբեր ծրագրերում ընդգրկելու և համագործակցության այլ հարցերում»,– նշել է Տարոն Մարգարյանը։
«Մենք բավական շատ նմանություններ ու ընդհանրություն ունենք, ուստի պետք է կարողանանք այդ ամենն օգտագործել գործնական հարաբերություններն առավել զարգացնելու և ընդլայնելու ուղղությամբ»,– նշել է դեսպան Սկապինին՝ իր հերթին առանձնացնելով Երևանի և իտալական քաղաքների հաջողված համագործակցության մի քանի ոլորտներ։
Կարևորելով Վենետիկի հետ հարաբերությունների զարգաման հեռանկարը, դեսպանը նշել է, որ Իտալական տնտեսության մեջ կարևոր դեր ունեցող Վենետոյի նահանգը նույնպես, որպես գործընկերոջ, հետաքրքրված է Հայաստանով և այս ասպարեզում նույնպես գործակցության զարգացման հեռանկարները քիչ չեն։
Հանդիպման ավարտին քաղաքապետ Տարոն Մարգարյանը մեկ անգամ ևս շեշտել է, որ քաղաքապետարանը շարունակելու է իրականացնել իտալական կողմի հետ պայմանավորվածություններն ու ծրագրերը և պատրաստ է էլ ավելի զարգացնելու ու ընդլայնելու համագործակցության ուղղությունները։