Հայոց ցեղասպանության բանաձևի քվեարկությունը ԱՄՆ ներկայացուցիչների պալատում կլինի առաջիկա 48 ժամվա ընթացքում

Ինչպես հաղորդում է «Ամերիկայի ձայնը», ԱՄՆ-ի Ներկայացուցիչների պալատում Հայոց ցեղասպանության հարցով քվեարկությունը կարող է անցկացվել մոտակա 48 ժամվա ընթացքում:
Այս մասին «Ամերիկայի ձայնին» տեղեկացրել են Ամերիկայի Հայ Դատի հանձնախմբում: Նրանք կոչ են արել զանգահարել ԱՄՆ-ի Կոնգրեսի համապատասխան ներկայացուցիչներին և պահանջել, որ նրանք կողմ քվեարկեն Հայոց Ցեղասպանությունը դատապարտող թիվ 252 բանաձևի ընդունմանը:
Վերջին մի քանի շաբաթների ընթացքում Ամերիկայի Հայ Դատի հանձնախմբի գրասենյակը, ինչպես նաև նրանց միացած մի շարք հայտնի ամերիկահայեր` Սերժ Թանկյան, Քիմ Քարդաշյան և այլոք սկսել էին մի գործընթաց, որի ժամանակ կոչ էին անում Ներկայացուցիչների պալատի ներկայիս խոսնակ Նենսի Փելոսիին կազմակերպել Ցեղասպանությունը ճանաչող օրինագծի քվեարկություն` ներկա Կոնգրեսի գործողության ժամկետի ավարտից առաջ Հայոց ցեղասպանության բանաձևն ընդունելու համար:
Այս շտապողականությունը կապված է նաև այն փաստի հետ, որ Ներկայացուցիչների պալատի նոր կազմում հայկական լոբբիստական կազմակերպությունները չունեն նույնքան աջակցություն, որքան այս մեկում, դրա համար էլ նրանք փորձում են քվեարկությունն անցկացնել մինչև դեկտեմբերի վերջ, երբ կավարտվի Պալատի այս գումարման լիազորությունների ժամկետը;