Լյուստրացիայի (գաղտնազերծման) գաղափարը նոր չէ, ոչ էլ «Ժառանգության» գաղափարն է, սակայն խնդիրն այսօր նույնքան հրատապ է, որքան վաղ իննսունականներին: «Քաղաքացիական ազգային նախաձեռնություն» ՀԿ-ի` այսօր կայացած կլոր սեղանի ժամանակ այս մասին հայտարարեց «Ժառանգություն» կուսակցության պատգամավոր Ստեփան Սաֆարյանը:
«Լյուստրացիայի օրենքին միս ու արյուն տալու համար մեր կողմից ուսումնասիրվել է միջազգային` գերմանական, ալբանական, վրացական, սերբական, մերձբալթյան երեք երկրների փորձը: Ավելի տպավորվեցինք վերջիններիս փորձով: Մենք պատմության դեմ կռվելու խնդիր չունենք, միաժամանակ ակնհայտ է, որ Հայաստանի մասին որոշումները Հայաստանում չեն կայացվում:
Պետք է փակել բոլոր այն խողովակները, որոնք թույլ են տալիս գործակալի աշխարհաճանաչողություն ունեցող մարդուն չափազանց բարձր պաշտոններ զբաղեցնել և որոշումներ կայացնել: Ահա սա է մեր ներկայացրած օրինագծի հիմքը:
Գաղտնազերծումը պայմանական համաներում է այն մարդկանց, ովքեր թեև բացահայտվում են, սակայն դրանով իսկ այլևս չեն կարող հավակնել բարձրագույն պաշտոնների` ՀՀ նախագահի, վարչապետի, կառավարության անդամների, ԱԺ պատգամավորների, ԱԱԾ կենտրոնական աշխատակազմի ղեկավար պաշտոններ զբաղեցնողների, մարզպետների, քաղաքապետների և այլն:
Մենք պետք է ստուգենք այս մարդկանց կենսագրությունը և թույլ չտանք, որ առաջիկա խորհրդարանական ընտրություններում լինեն այդպիսի անցյալ ունեցող մարդիկ:
«Ժառանգությունն» այս օրինագիծն ամենևին էլ սեփական PR-ի համար չի առաջարկել (PR է մեր գործունեության յուրաքանչյուր օրը), այլ այն բանի համար, որպեսզի թույլ չտա ուրիշ երկրների հետ համագործակցած մարդկանց մուտքը կառավարման մարմիններ:
Սրանով սկսվում է գործակալական ցանցի դուրսմղման սահուն գործընթաց: Եթե ներկա պաշտոնյաների շարքում կան նման անցյալ ունեցողներ, նրանք պետք է ինքնակամ հրաժարվեն իրենց առաջարկված պաշտոնից: Հանրությունը պետք է տեղեկացված լինի նման մարդկանց մասին:
Ոմանք նշում են, թե լյուստրացիան անթույլատրելի է: Նույնիսկ պարզաբանումներից հետո նրանք շարունակեցին պնդել, թե մենք պետության դեմ ուղղված աշխատանք ենք տանում, սակայն առնվազն խելագար և սակավամիտ պետք է լինել սեփական երկրի շահի դեմ գնալու համար:
Նրանք ուղղակի հասարակությանն ուզում են ապակողմնորոշել, թե իբր «Ժառանգությունն» իր այս օրենսդրական նախաձեռնությամբ դավաճանության է գնում»,- ամփոփեց Սաֆարյանը:
