ՀՀԿ լրատվական ծառայությունից «Առաջին լրատվական»-ին տեղեկացնում են, որ դեկտեմբերի 7-ին Մարսելում տեղի է ունեցել Եվրոպական ժողովրդական կուսակցության կոնգրեսի առաջին լիագումար նիստը` կազմակերպության ղեկավար Ուիլֆրիդ Մարթենսի գլխավորությամբ, որին մասնակցել է նաև ՀՀԿ նախագահ Սերժ Սարգսյանը` որպես կոնգրեսի հատուկ հյուր:
Ելույթ ունենալով կոնգրեսի ամբիոնից` Մարթենսը Ս. Սարգսյանին հրավիրել է մասնակցել այսօր` դեկտեմբերի 8-ին կայանալիք Եվրոպական երկրների ու կառավարությունների ղեկավարների գագաթաժողովին:
«Այսօրվանից Դուք Ձեզ կարող եք համարել Եվրոպական ժողովրդական կուսակցության մեծ ընտանիքի անդամ»,- հայտարարել է Վ. Մարթենսը` դիմելով Ս. Սարգսյանին և հանդիսավոր կերպով նրան փոխանցել գագաթաժողովին մասնակցելու հրավերը և ԵԺԿ անդամի կրծքանշանը:
Իր ելույթում Մարթենսը նշել է, որ Հայաստանը արևմուտքի և արևելքի միջև դարպաս է, իսկ եվրոպական ընտանիքը Հայաստանի հետ ընդհանուր արմատներ ունի, ժառանգություն և ճակատագիր: Կազմակերպության նախագահն ընդգծել է, որ ՀՀ նախագահը կոնգրեսի աշխատանքին մասնակցում է հայերի համար կարևոր մի օր` 1988թ. դեկտեմբերի 7-ին, երբ Հայաստանում տեղի ունեցավ երկրաշարժ:
Մարթենսն անդրադարձել է այն նախաձեռնություններին, որոնցով տարածաշրջանում հանդես է գալիս Հայաստանը` ընդգծելով Թուրքիայի հետ հարաբերությունների բարելավմանն ուղղված Հայաստանի ջանքերը:
«Հայաստանն ընթանում է բարեփոխումների ճանապարհով, կառուցում է խաղաղ ժողովրդավարություն: Անցնելով շուկայական տնտեսության` երկիրը գտավ իր տեղը միջազգային ասպարեզում և հայացքն ուղղեց դեպի Եվրոպա»,-հայտարարել է Մարթենսը:
ԵԺԿ նախագահն իր վստահությունն է հայտնել առ այն, որ իշխող ՀՀԿ-ն, «Օրինաց երկիր» և «Ժառանգություն» կուսակցությունները կկարողանան մոտ ապագայում դառնալ ԵԺԿ-ի կառուցողական գործընկերներ` հավելելով, որ վերջնական որոշումը կկայացվի 2012թ. փետրվարին:
Համաձայն ԵԺԿ-ի պաշտոնական կայքում տեղադրված հաղորդագրության` ԵԺԿ կոնգրեսին կմասնակցեն Ֆրանսիայի նախագահ Նիկոլա Սարկոզին ու վարչապետ Ֆրանսուա Ֆիյոնը, Գերմանիայի կանցլեր Անգելա Մերկելը և այլք:
ԵԺԿ-ն համաեվրոպական խոշորագույն կուսակցությունն է, որը միավորում է Քրիստոնեա-դեմոկրատական, պահպանողական ուղղվածության կուսակցություններին:
Կուսակցությունում ընդգրկված են ԵՄ անդամ 26 երկրների և եվրոպական ևս 13 երկրների 72 կուսակցություններ:
ԵԺԿ-ին անդամակցության հայտեր են ներկայացրել հայաստանյան 4 կուսակցություններ` ՀՀԿ-ն, ԲՀԿ-ն, ՕԵԿ-ն ու «Ժառանգությունը»:
Տեղեկացնենք, որ ՀՀԿ-ն դարձել է ԵԺԿ փաստացի դիտորդանդամ, որը ոչ ԵՄ անդամ երկրների համար կարելի է համարել լիարժեք անդամություն:
