ՆԱՏՕ-ի գլխավոր քարտուղար Անդերս ֆոգ Ռասմուսսենը կոչ է արել Ռուսաստանի իշխանություններին գումարները ծախսել երկրի մոդեռնացման համար, և ոչ թե պատասխան միջոցներ ձեռնարկել, որոնք, Մոսկվայի պատկերացմամբ, կարող են չեզոքացնել Արևելյան Եվրոպայում ԱՄՆ հակահրթիռային պաշտպանության օբյեկտների տեղադրումից առաջացած ազդեցությունը:
«Ռուսաստանի հակազդեցության միջոցառումները ՀՀՊ համակարգում գումարի անիմաստ վատնում են»,- հայտարարել է Ռասմուսսենը՝ Բրյուսելում դաշինքի 28 անդամ-երկրների արտգործնախարարների հանդիպման նախօրեին:
Ինչպես հաղորդում է Deutsche Welle-ն, գլխավոր քարտուղարի խոսքերով՝ այդ միջոցները ավելի մեծ արդյունավետությամբ կարելի է օգտագործել ժողովրդի բարօրության, նոր աշխատատեղերի ստեղծման և ռուս հասարակության մոդեռնացման համար:
Հիշեցնենք, որ Ռուսաստանի նախագահ Դմիտրի Մեդվեդևը նոյեմբերի վերջին հայտարարել էր, թե Ռուսաստանը խիստ միջոցներ կձեռնարկի ԱՄՆ ԵվրոՀՀՊ համակարգի դեմ: Ռուսաստանի նախագահի խոսքերով՝ չնայած ԱՄՆ իշխանությունների հավաստիացումներին, թե ԵվրոՀՀՊ-ն ուղղված չի լինի Ռուսաստանի դեմ, որոշ երկրների «օրենսդիր մարմիններ ուղղակիորեն հայտարարում են՝ նկատի ունեցեք, դա ձեր դեմ է ուղղված»: