Սիրելի հայրենակիցներ, 2011 թվականի հունվարի 1-ից իշխանությունները մտադիր են կիրարկել «Տրանսպորտային միջոցների պարտադիր ապահովագրման մասին» օրենքը, որն արդարացի դժգոհություն է առաջացրել քաղաքացիների մոտ: Դժգոհության հիմնական պատճառներն են` 1. Կենտրոնական Բանկի կողմից հաստատված պայմանագրերի սակագները բավականին բարձր են եւ չեն համապատասխանում հասարակության մեծ մասի սոցիալական անմխիթար վիճակին, 2. Պատահարների հետեւանքով վնասի փոխհատուցման առավելագույն գումարները անհամաչափ ցածր են պայմանագրերում ֆիքսված գների համեմատ, 3. Ապահովագրական ընկերությունների լիցենզավորման կարգը թափանցիկ չէ, ինչի արդյունքում մեքենաների ապահովագրման ոլորտը վերածվելու է մենաշնորհի, 4. Հակառակ շուկայական տնտեսության սկզբունքների` նոր օրենքով ապահովագրական ընկերություններին հնարավորություն չի տրվել պայմանագրերի ֆիքսված գներից ցածր սակագներ սահմանել, ինչը բացառելու է ապահովագրողների իրական մրցակցությունը եւ հետեւաբար` ապահովագրության սակագների նվազեցումը, 5. Օրենքի կիրարկման արդյունքում, փաստորեն, կապահովվի ընդամենը մի խումբ մարդկանց համար գերշահույթ` ի հաշիվ շարքային քաղաքացիների սուղ միջոցների, 6. ԱՊՊԱ-ի կիրարկման ժամկետները բացարձակապես չպատճառաբանված են եւ հապճեպ: «Ժառանգություն» կուսակցությունը քաղաքացիներին կոչ է անում երեքշաբթի օրը` դեկտեմբերի 21-ին, իրենց մեքենաներով մասնակցել Երեւանում, Գյումրիում, Վանաձորում եւ Արմավիրում ԱՊՊԱ-ի գործող օրենքի եւ դրանում ամրագրված անընդունելի պայմանների դեմ ուղղված ավտոերթերին: Երեւանում այն կմեկնարկի ժամը 16.00-ին Բրազիլիայի հրապարակից («Հրազդան» մարզադաշտի հարեւանությամբ): Ավտոերթը Երեւանում կրելու է զանգվածային միջոցառման բնույթ, եւ դրա մասին իրազեկվել է քաղաքապետարանը, ինչն ընդունել է ի գիտություն: Պտույտ գործելով քաղաքի կենտրոնով` ավտոերթը կավարտվի Հանրապետության հրապարակում` կառավարության շենքի առջեւ: Գյումրիում ավտոերթը կմեկնարկի ժամը 16:00-ին Սախարովի անվ. հրապարակից (58 թաղ.-ի խաչմերուկ): Վանաձորում ավտոերթը կմեկնարկի ժամը 16:00-ին Բազում թաղամասի ավտոբուսի վերջին կանգառից: Արմավիրում ավտոերթը կմեկնարկի ժամը 14:00-ին քաղաքապետարանի հարակից հրապարակից: Երեւան, Գյումրի, Վանաձոր եւ Արմավիր քաղաքներում բողոքի ավտոերթն ավարտելուն պես` մասնակիցների անունից կառավարությանը կհանձնվի քաղաքացիական պահանջագիր: Ավտոերթի նպատակն է Հայաստանի օրենսդիր և գործադիր իշխանություններից պահանջել վերանայել ԱՊՊԱ օրենքը, հետաձգել ԱՊՊԱ պայմանագրերի կնքման վերջնաժամկետը, վերանայել ապահովագրման պայմանները` հաշվի առնելով բնակչության մեծ մասի սոցիալական ծանր վիճակը:
«Ժառանգություն» կուսակցություն
