Ըստ նոր հետազոտության արդյունքների՝ 2011 թվականի մարտ ամսին Ճապոնիայում տեղի ունեցած երկրաշարժի պատճառով ծովի հատակին բացվել են մինչև 3 մետր խորություն ունեցող ճեղքեր:
Ճապոնիայի Կյոտո համալսարանի գիտնական և հետազոտող Տակեշի Տսույին ասել է, որ այնտեղ, որտեղ մի ժամանակ խաղաղ կակղամորթներն էին գտնվում, այժմ հսկայական ճեղքեր են: Սեյսմիկ ուսումնասիրությունները ցույց են տվել, թե ինչպես է երկրաշարժի էպիկենտրոնի տարածքում գտնվող երկրակեղևն ընդլայնվել և ճեղքվել: Ճեղքերը բացահայտվել էին երկրաշարժից հետո՝ սուզանավերի միջոցով հետազոտություն անցկացնելու արդյունքում։
Msnbc.com-ը գրում է, որ Տսույին և նրա գործընկերները բացառիկ հնարավորություն են ունեցել տեսնելու, թե ինչ փոփոխությունների է ենթարկվել ծովի հատակը մարտի 11-ի 9 մագնիտուդ հզորությամբ երկրաշարժից հետո: Մինչ երկրաշարժը հետազոտողները նկարել էին ծովի հատակը հենց այն նույն տարածքում, որտեղ ավելի ուշ տեղի էր ունեցել հզոր ցունամին` դառնալով գրեթե 20.000 մարդու մահվան պատճառ:
«Ընդ որում՝ երկրաշարժի արդյունքում ծովի ընդերքը ոչ միայն դեպի դուրս է հրվել, այլ նաև հորիզոնական ձևով ընդլայնվել է, ինչպես ակորդեոնը»,– իր զեկույցում նշում է Տսույին: Սա էլ հենց պատճառ է հանդիսացել ճեղքերի առաջացման համար:
