Ինչպես հայտնում է «Ազատություն» ռադիոկայանը, ՀՀ կառավարությունը մերժել է Մարտի 1–ի զոհերի ընտանիքներին հաջորդ տարվա բյուջեից գումար հատկացնելու առաջարկը։
«Ժառանգություն» խմբակցությունն առաջարկել էր 500 միլիոն դրամի փոխհատուցում սահմանել զոհերի ընտանիքների համար` հիմնավորելով, որ այդ անձինք պետական մարմինների ոչ իրավաչափ գործողությունների զոհն են դարձել, ուստի պետությունը պետք է պատասխանատվություն ստանձնի դրա համար
«Նշում են, որ նրանց ոչ իրավաչափ արձագանքի վերաբերյալ պաշտոնական գնահատական չկա: Սա ուղղակի խայտառակություն է, որովհետև անգամ Ազգային ժողովի նորընծա նախագահ Սամվել Նիկոյանի գլխավորած հանձնաժողովը տվել էր ոչ իրավաչափության գնահատականը: Հիմա անգամ հրաժարվում են այն գնահատականներից, որոնք տվել են հենց իրենք»,- ասել է «Ժառանգություն» խմբակցության ղեկավար Ստյոպա Սաֆարյանը:
Մարտիմեկյան իրադարձությունների զոհերի ընտանիքները միշտ խուսափել են բարձրաձայնել հարազատների ու որդիների կորստից հետո կրած զրկանքների և նաև սոցիալական ծանր վիճակի մասին` իրենց գերխնդիրը դարձնելով որդիների մահվան համար պատասխանատուներին պատժված տեսնելը:
Այսօր «Ազատություն» ռադիոկայանը այցելել է զոհերից մի քանիսի տուն:
Պարզվել է, որ, օրինակ, Սամվել Հարությունյանի ընտանիքը, որտեղ ոչ ոք չի աշխատում, 1 լումայի փոխհատուցում անգամ չի ստացել պետությունից: Այս ընտանիքում ոչ ոք չի աշխատում:«Գումարները իրենց գրպանի, իրենց շենքերի, իրենց ավտոյի, իրենց էրեխեքի համար են, որ հղփանան, ոչ թե մեր նման խեղճ ու կրակների: Ես իմ էրեխու գերեզմանը չեմ կարողանում սարքել», – ասել է Սամվելի հայրը՝ Էդիկ Հարությունյանը:
Մարտի 1-ին զոհված Դավիթ Պետրոսյանի մայրը՝ Ջեմմա Վարդումյանը, ապրում է ամսական 30 հազար դրամ թոշակով: Նա պատմել է, որ ամիսներ առաջ ոտքը կոտրվել է, բայց հիվանդանոցում պառկելու համար գումար չի ունեցել:
Մարտի 1-ին զոհված Տիգրան Խաչատրյանի ընտանիքը սոցիալապես անապահով չէ, բայց Մարտի 1-ից հետո Տիգրանի մորը՝ Ալլա Հովհաննիսյանին, ով դպրոցի տնօրեն է եղել, հեռացրել են աշխատանքից։ Նրա կարծիէով՝ պատճառն այն է, որ ինքը մասնակցել է ցույցերին։ Ըստ նրա՝ իշխանություններին թվացել է, թե պաշտոնի համար որդեկորույս մայրը պետք է լռեր։
«Ցավալին այն է, որ մեր երեխաների սպանություններից հետո միանգամից մեր ընտանիքները իշխանության կողմից դիտարկվեցին որպես թշնամիներ: Մենք այս երկրում ոչ ցանկալի անձնավորություններ ենք, մենք այդ ամեն ինչը զգում ենք ամեն հարցում, իշխանությունները մեզ հետ շփվելու ոչ մի ցանկություն չունեն: Այն ժամանակ կունենային, երբ մենք լռեինք, այդ ժամանակ մեզ գրկաբաց կընդունեին», – ասել է Ալլա Հովհաննիսյանը։
Ալլա Հովհաննիսյանը «վրեժխնդրություն» է անվանել իրենց փոխհատուցում տրամադրելու առաջարկին կառավարության մերժումը:
