Ժնևի բանակցությունների հերթական փուլը տեղի կունենա 2011 թվականի մարտի 4-ին: Այդ մասին, ինչպես հաղորդում է Новости-Грузия-ն, այսօր տեղեկատվություն է հրապարակել ԵԱՀԿ-ի պաշտոնական կայքը՝ ամփոփելով դեկտեմբերի 16-ին Ժնևում կայացած բանակցությունների արդյունքները: ԵԱՀԿ-ի հաղորդագրության մեջ դրականորեն Է գնահատվում ուժի չկիրառման վերաբերյալ Վրաստանի նախագահ Միխեիլ Սաակաշվիլիի նախաձեռնությունը, որը նա հնչեցրել է նոյեմբերի 23-ին Եվրախորհրդարանում ամբիոնից:
ԵԱՀԿ կողմից Ժնևի բանակցությունների համանախագահ Բուլատ Նուրգալիևը «կարևոր քայլ» է համարել Վրաստանի նախագահի նախաձեռնությունը: «Դա կարելի է դիտել որպես ճիշտ ուղղությամբ կատարված կարևոր քայլ»,-ասել Է Նուրգալիևը: Նրա խոսքով, «ևս մեկ կարևոր իրադարձություն է Էրգնեթիում/Դվանիում միջադեպերի կանխմանն ուղղված հանդիպումների վերսկսումը»:
Ժնևի բանակցություններում վրացական պատվիրակությունը գլխավորել է երկրի ազգային անվտանգության խորհրդի քարտուղար Գեորգի Բոկերիան: Ինչպես հայտնում են վրաստանյան գործակալությունները, վրաստանյան պատվիրակության անդամ Վրաստանի փոխարտգործնախարար Սերգի Կապանաձեն հայտարարել է, որ ռուսական կողմը կասկածի տակ է դրել 2008 թվականի օգոստոսի 12-ի հրադադարի մասին համաձայնագիրը: