Գյուղատնտեսության ապահովագրական համակարգը թանկ հաճույք է և բերում է ծախսերի ավելացում: Ինչպես այսօր Ազգային ժողովում նշեց վարչապետ Տիգրան Սարգսյանը, նախ պետք է հարց դրվի՝ մտցնել պարտադիր, թե կամավոր ապահովագրություն: «Պարտադիրի դեպքում լրացուցիչ բեռ է ավելանում գյուղացու համար, իսկ կամավորի դեպքում քանակը կլինի քիչ և շատ ավելի թանկ: Դրա համար ապահովագրական համակարգի ներդրումը գտանք ոչ նպատակահարմար»:
Տ.Սարգսյանի խոսքով, դա նշանակում է, որ պետությունը պետք է ձեռնարկի այլ միջոցառումներ, որ խթանի գյուղատնտեսության զարգացումը: Ըստ վարչապետի՝ մշակվել է երկարաժամկետ համալիր ծրագիր, որը ներառում է վարկային տոկոսների սուբսիդավորումը, պարարտանյութի խնդիրները, գյուղտեխնիկայով և սերմերով ապահովում. «Բացի ցորենի և գարու սերմերից, մտադիր ենք ընդլայնել սերմերի քանակն ու տեսականին»:
