РИА Новости-ի փոխանցմամբ՝ Ռուսաստանի Էներգետիկայի նախարար Սերգեյ Շմատկոն Կատարի մայրաքաղաք Դոհայում տեղի ունեցած Նավթի 20-րդ համաշխարհային կոնգրեսի ժամանակ հայտարարել է, որ Ռուսաստանն անհրաժեշտ չի համարում Իրանի նկատմամբ էներգետիկ բեռնարգելքին միանալը.
«Ռուսաստանը նավթի ու գազի խոշոր արտահանող երկիր է, որը չի գործածում անգամ մեկ տոննա իրանական էներգակիր։ Դրա համար էլ մենք անհրաժեշտ չենք համարում միանալ Իրանի նկատմամբ էներգետիկ բեռնարգելքին։ Մենք ընդհանրապես չունենք իրանական նավթի ներկրման պլաններ։
Անհրաժեշտ է խուսափել էներգետիկ ոլորտին առնչվող հարցերի քաղաքականացումից։ Մինչդեռ Իրանի պարագայում միանշանակորեն ակնհայտ է դառնում, որ հարցը կրում է քաղաքական բնույթ։ Նման հարցերում մենք զբաղեցնում ենք առավելագույնս չեզոք դիրք»։
Հիշեցնենք, որ էներգետիկայի գծով եվրակոմիսար Գյունթեր Օթթինգերը Դոհայում հայտարարել էր, որ ԵՄ-ի անդամ երկրները փոխհամաձայնության են հանգել Իրանի նկատմամբ նավթային բեռնարգելք սահմանելու հարցում, և որ ԵՄ-ը պատրաստ է բեռնարգելք սահմանել իրանական նավթի ներկրման վրա։ Օթթինգերը նաև կարևորել էր ԵՄ-ի այդ բեռնարգելքին ԱՄՆ-ի, Ռուսաստանի և այլ երկրների միանալը։
