Այսօր Երեւանում իր աշխատանքն է ավարտել Եվրոպայի խորհրդի «Ժողովրդավարության ապագայի համար» համաժողովը: Համաժողովի փակմանը ելույթներով հանդես եկան Եվրոպայի խորհրդի գլխավոր քարտուղար Թորբյորն Յագլանդը եւ ՀՀ ԱԳ նախարար Էդվարդ Նալբանդյանը:
Իր խոսքում Նալբանդյանը հայտարարել է. «Հայաստանի մերձեցումը եվրոպական ընտանիքին ընթանում է բնական կերպով, որովհետեւ մեր ժողովրդի մշակութային, դավանաբանական, լեզվական ու աշխարհընկալման առումներով սա վերադարձ չէ. խորքային արժեքային համակարգի տեսանկյունից մենք մնացել ենք նույն տեղում` հավատարիմ այն ակունքներին, որոնք նաեւ Եվրոպայինն են»:
«Հայաստանում շուտով նշելու ենք անկախության 20-ամյակը: Հայաստանի, ինչպես եւ ամբողջ Եվրոպայի համար անցած քսան տարիները էական վերափոխումների ժամանակաշրջան էին, որը մենք փորձեցինք անցնել ձեռք ձեռքի տված: …Ժողովրդավարությունը կենդանի օրգանիզմ է` ազգային, տարածաշրջանային եւ համընդհանուր յուրահատկություններով, որը ձեւավորվում եւ շարունակաբար զարգանում է: Կարող ենք համամիտ լինել այն մտքին, որ ժողովրդավարությունը պետք է լինի շարունակական, այլապես այն կդադարի ժողովրդավարություն լինելուց»,- հայտարարել է Նալբանդյանը:
