ԱԺ նախկին նախագահ Հովիկ Աբրահամյանը ևս մասնակցեց ԱԺ նախագահի ընտրությանը:
«Առաջին լրատվական»-ի հարցին` հնարավո՞ր է համարում ԲՀԿ-ՀԱԿ համագործակցությունը, Հովիկ Աբրահամյանը պատասխանեց. «Իրենց պետք է դիմեք: Հստակեցնեմ իմ դիրքորոշումը` խնդրում եմ հարցը տվեք հարցատիրոջը, ովքեր պետք է պատասխանեն»:
Անդրադառնալով ներքաղաքական զարգացումներին` նա հավելեց նաև. «Նախընտրական գործընթացները սկսվել են, յուրաքանչյուր քաղաքական ուժ փորձում է հստակեցնել իր դիրքորոշումը, փորձում է հասկանալ` ով ում հետ է գնալու:
Իմ կարծիքով` դրանք շատ պարզ քայլեր են և որևէ գործընթացի հետ պետք չէ կապել, այլ ուղղակի պետք է կապել նախընտրական ընտրարշավի հետ, որովհետև մենք սկսել ենք այդ պրոցեսը, և քաղաքական ուժերը պարտավոր են հստակեցնել իրենց քայլերը` ում հետ են գնալու: Ես գտնում եմ, որ այսօր ՀՀԿ-ԲՀԿ-ՕԵԿ-ի միջև կոալիցիա կա, և այն դեռ գործում է, որևէ այլ խնդիր ես չեմ տեսնում»:
Հ. Աբրահամյանի կարծիքով` ՀԱԿ-ը ԱԺ-ում իր մասնակցությունը կունենա:
Հ. Աբրահամյանին ուղղեցին նաև հետևյալ հարցը. չի՞ պատրաստվում արդյոք խորհուրդներ տալ Սամվել Նիկոյանին: «Սամվել Նիկոյանը խորհուրդների կարիք չունի, նրա երեք տարվա աշխատանքը դա ապացուցել է»,- պատասխանեց նա:
Չե՞ք փոշմանել, որ հանրապետության երկրորդ պաշտոնյայի պաշտոնը թողել եք` հարցին նա պատասխանեց. «Ոչ, այդ որոշումը ընդունելուց առաջ լավ մտածել եմ»:
Հովիկ Աբրահամյանը տեղեկացրեց նաև, որ այսօրվանից սկսում են շտաբի ձևավորման նախապատրաստական աշխատանքները, և այսօր երեկոյան ժամը վեցին խորհրդակցություն կանցկացնի ՀՀԿ-ական մարզպետների և քաղաքապետի հետ:
Տեղեկացնենք, որ այս պահին ԱԺ-ում ընթանում են ԱԺ նախագահի ընտրություններ, պատգամավորները քվեարկում են առանձին` երկու խցերում, և մոտենում են քվեատուփին: