Հաշմանդամություն ունեցող անձանց միջազգային օրվան նվիրված այսօր ՄԱԿ-ի հայաստանյան գրասենյակում տեղի ունեցավ ցուցահանդես-վաճառք: Ցուցահանդեսին ներկայացված էին հաշմանդամություն ունեցող երեխաների և մեծահասակների ձեռքի աշխատանքներ`նկարներ, ասեղնագործություններ, կուժեր, տոնական եղևնու խաղալիքներ և այլն:
ՄԱԿ-ի հանրային տեղեկատվության վարչության հայաստանյան գրասենյակի օժանդակությամբ «Փյունիկ» հաշմանդամների միությունը, «Հայկական ճամբար» կազմակերպությունն ու «Էմանուել» ՀԿ-ն հանրությանը ներկայացրեցին իրենց անդամների աշխատանքները:
Հաշմանդամություն ունեցող անձանց միջազգային օրվա ամենամյա հիշատակումը նպատակ ունի զարգացնել հաշմանդամության խնդիրների ըմբռնումը և համախմբել հաշմանդամություն ունեցող անձանց արժանապատվության, իրավունքների և բարեկեցության աջակցությունը: Այն նաև նպատակ ունի բարձրացնել իրազեկությունն այն ձեռքբերումների վերաբերյալ, որ կարող ենք ունենալ քաղաքական, սոցիալական, տնտեսական և մշակութային կյանքի բոլոր բնագավառներում հաշմանդամություն ունեցող անձանց ներգրավելու արդյունքում:
Այս տարվա հաշմանդամություն ունեցող անձանց միջազգային օրվա թեման է. «Լիակատար մասնակցություն և հավասարություն»:
