ՀՌԱՀ երեկվա որոշումը ԱԼՄ-ին եթերից զրկելու վերաբերյալ «ԱԼՄ» հոլդինգի նախագահ Տիգրան Կարապետյանը ակնհայտ կեղծիք անվանեց՝ հավելելով, որ որոշել են իրեն լկտիաբար եթեր չտալ և դրա համար որևէ լուրջ պատճառաբանություն չունեն։ Կարապետյանը նշեց, որ բոլոր ապացույցներն ունի և պատրաստվում է դիմել դատարան, սակայն եթե դա էլ արդյունք չտա, հասնելու է ընդհուպ մինչև Եվրադատարան: Տիգրան Կարապետյանը նշեց, որ իրենք ուժային պայքարի չեն դիմելու. «Չարին պետք է անմիջապես խաչը դեմ տաս, մենք խաչերով մոմավառություն ենք իրականացնելու: Ես օյինբազություններ չեմ ընդունում, ժողովուրդը պետք է գործոն լինի և ոչ թե գործիք»: Կարապետյանը նաև տեղեկացրեց, որ դիմել է Ռուսաստանի իր ընկերներին, ովքեր խոստացել են մի քանի միլիոն ուղարկել, որպեսզի ինքը մարզային հեռուստաընկերություններից որևէ մեկի բաժնետոմսերը գնի: Կարապետյանի գնահատմամբ, իշխանությունները փորձում են ընտրություններից առաջ լռեցնել իրեն. «Ես հիմա հեռուստաընկերություն չունեմ, բայց ես հաճույք չեմ պատճառելու ինձ եթերից զրկողներին: Ես մարդկանց հետ երես առ երես եմ հանդիպելու` օն-լայն»:
Կարապետյանի խոսսքերով, ինքը Ամալյանին չի մեղադրում, քանի որ վերջինս կամակատար է. «Բայց Ամալյանի նկարը ես սիրուն ձևերով կտպեմ մեր ժուռնալում»:
Իսկ «Ա1+»-ին հերթական անգամ եթեր չտրամադրելու վերաբերյալ Տիգրան Կարապետյանն ասաց. «Դա քաղաքական որոշում էր: Իշխանությունը կընկնավորվեր և ինֆարկտ կստանար, եթե «Ա1+»-ին եթեր տրվեր»։