«Իրավունքի եւ ազատության կենտրոն » ՀԿ նախագահ Վարդան Հարությունյանը երեկ բաց նամակ է գրել ԵԽԽՎ-ում Հայաստանի հարցով համազեկուցող Ջոն Պրեսկոտին: Հարությունյանն իր նամակում գրել է, որ մամուլից տեղեկացել է, որ Պրեսկոտը, լինելով ԵԽԽՎ-ում Հայաստանի հարցով համազեկուցող, լրագրողներին ասել է, որ հրաժարվում է խոսել Հայաստանի եւ հայաստանյան բանտերում գտնվող քաղբանտարկյալների մասին:
«Մեր ուշադրությունը գրավեց ոչ թե Ձեր՝ խոսելուց հրաժարվելը, ինչը, անկացկած, Ձեր իրավունքն է, այլ այն պատճառաբանությունը, թե ինչու եք հրաժարվում: Դուք ասել եք. «Ես համազեկուցող եմ, պետք է զեկույց պատրաստեմ: Երբ հանդիպում եմ իշխանությունների հետ, նրանք դժգոհում են, որ իրականությունը չեմ ներկայացնում: Երբ հանդիպում եմ ընդդիմության հետ, նրանք են ասում, որ իրականությունը չեմ ներկայացնում»: Դուք փաստորեն ընդունում եք, որ էապես կախված եք հայաստանյան իշխանությունների եւ ընդդիմության իրարամերժ կարծիքներից»,- գրել է Հարությունյանը:
Վերջինս, սակայն, անգլիացի համազեկուցողին հիշեցրել է, որ այնինչ ԵԽԽՎ այդ մանդատը իրենց տրված է ոչ թե ընդդիմության կամ իշխանության կարծիքներից կախված լինելու կամ դրանցից վախենալու , այլ հայաստանյան իրականությունը ուսումնասիրելու, ազատորեն սեփական կարծիքն արտահայտելու եւ այն անաչառ կերպով ԵԽԽՎ-ին ներկայացնելու համար:
«Ձեր այս խոսքերից ավելի քան պարզ է դառնում, թե ինչու այս 2,5 տարին այդպես էլ բավարար չեղավ ԵԽԽՎ կողմից հայաստանյան կեղծված ընտրությունների միանշանակ դատապարտման եւ քաղաքական բանտարկյալների ազատ արձակման համար: Դուք փաստորեն զբաղված եք եղել՝ ոչ թե համազեկուցողի մանդատից բխող խնդիրները լուծելով, այլ` հայաստանյան ընդդիմության եւ իշխանության միջեւ խուսավարելով»,- գրել է իրավապաշտպանը:
Հարությունյանը նաեւ հավելել է, որ քանի որ Պրեսկոտը հայաստանյան ընդիմության եւ իշխանության ճնշումներից ձերբազատվել չի կարողանում, ուստի հորդորում է վերջինիս «հնարավորինս շուտ հրաժարվել Հայաստանի հարցերով համազեկուցողի մանդատից»:
«Գուցե այն Ձեր հրաժարականից հետո փոխանցվի շատ ավելի անկախ ու անաչառ պատվիրակի, ով, մի կողմ դրած հայաստանյան ընդդիմության եւ իշխանության իրարամերժ շահերը, կկարողանա հայաստանյան իրականությունն անաչառ կերպով ներկայացնել ԵԽԽՎ-ին, ինչն էլ հենց պահանջում է համազեկուցողի մանդատիը»,-գրել է Վարդան Հարությունյան:
