Ազգային վիճակագրական ծառայության տվյալներով,այս տարվա երրորդ եռամսյակի պարենային զամբյուղի արժեքը (30,451 դրամ) նախորդ եռամսյակի (35,174 դրամ) համեմատ մոտ 5 հզ. դրամով անկում է ապրել, ինչը շատ զարմանալի է առկա գնաճի պայմաններում: Նման կարծիք «Առաջին լրատվական»-ի հետ զրույցում հայտնեց Ժողովրդի իշխանություն հասարակական-քաղաքական նախաձեռնության համակարգող խորհրդի անդամ, տնտեսագետ Մովսես Արիստակեսյանը:
«Աշնանը պարենային զամբյուղը պետք է մի քիչ էժանանա, բայց եթե դա վերաբերում է բանջարեղենին, մրգին, ապա նույնը չենք կարող տեսնել մսի, կաթնամթերքի և այլ պարենային ապրանքների դեպքում»,- ասաց Մ. Արիստակեսյանը:
ԱՎԾ հաշվետվությունների համաձայն՝ պարենային ապրանքների գները 2011 թ. հունվար-օգոստոսին, նախորդ տարվա հունվար-օգոստոսի համեմատ, ցույց են տալիս պարենային ապրանքների գների 114.5% աճ, սեպտեմբերի դեպքում՝ 115% աճ էր եղել: Այսինքն՝ Մ. Արիստակեսյանի խոսքով, անընդհատ պարենային զամբյուղը թանկանում է, բայց այդ պարագայում պարենային զամբյուղի արժեքն իջել է 5 հզ. դրամով:
Տնտեսագետը տեղեկացրեց, որ իր գնահատականով, պարենային զամբյուղը 34,942 դրամ է, ու թեև իր մոտ էլ որոշակի անկում է եղել (երկրորդ եռամսյակի համար 37 հզ. դրամ էր), բայց այս անկումը 2 հզ. դրամով է, ոչ թե ԱՎԾ ցույց տված 5 հզ. դրամ ցուցանիշը:
Ամեն դեպքում պարենային զամբյուղի արժեքը բարձր է նվազագույն աշխատավարձի չափից՝ 32.5 հզ. դրամից, այսինքն դրանով է բնութագրվում ծայրահեղ չքավորությունը: Այդ նույն պարենային զամբյուղի արժեքի հիման վրա հաշվարկված սպառողական զամբյուղը ԱՎԾ տվյալներով ստացվում է 63,900 դրամ, իսկ Մ. Արիստակեսյանի գնահատականներով՝ 104,826 դրամ: Այսինքն՝ ինչպես դիտարկեց տնտեսագետը, յուրաքանչյուր աշխատավոր մարդ պետք է ստանա 105 հզ. դրամ, իսկ ԱՎԾ գնահատականով՝ 64 հզ. դրամ, որ համարվի ոչ աղքատ: Մինչդեռ հաջորդ տարի բյուջեով նվազագույն աշխատավարձը մնում է նույնը՝ 32.5 հզ. դրամ, քաղծառայողների և պետծառայողների բազային աշխատավարձերը չեն բարձրացել, և նոր բյուջեով գնում ենք դեպի աղքատացման:
«Իրավիճակը հիմա սրվում է նոր գնային ճնշումներով, և գները կրկին աճում են ամանորյա սպասումներով: Ի տարբերություն քաղաքակիրթ երկրներում առևտրի, երբ մեծ զեղչեր են լինում, Հայաստանում, չգիտես ինչու, միշտ դիտարկվում է գնաճ, և բոլորը ցանկանում են ամանորյա առևտրից ավելի մեծ գերշահույթներ ունենալ: Սա վերաբերում է և՛ պարենային, և՛ ոչ պարենային ապրանքներին, էլ չեմ ասում ծառայությունների ոլորտի թանկացումների մասին»,- նշեց Մ. Արիստակեսյանը՝ հավելելով, որ ամանորյա զամբյուղը էապես տարբերվում է պարենային նվազագույն զամբյուղից: Դրա մեջ ավելանում է խոզի բուդ, հնդուհավ, աղանդերը, որը մենք սովորական կյանքում չենք օգտագործում, բայց նոր տարվա սեղանին պետք է լինի դա: Տնտեսագետի խոսքով, յուրաքանչյուր անձի հաշվով ամանորյա սեղանը կարժենա նվազագույնը 35 հզ. դրամի չափով, որը 3-4 օրում կվերջանա:
