Այսօր «Թումո» ստեղծարար տեխնոլոգիաների կենտրոնում մեկնարկել է Հայաստանում տեղեկատվական տեխնոլոգիաների զարգացմանը նվիրված ArmNet կոնֆերանսը, որի կազմակերպիչներն են SP Marketing Solutions, Orange Armenia ընկերությունները և Հայաստանի Ինտերնետ hանրություն ՀԿ-ն։
SP Marketing Solutions-ի տնօրեն Հայկուհի Տաքսիլդարյանը հայտնեց, որ այսօր երեկոյան, փակ միջոցառման ժամանակ կհայտարարվեն Armnet Awards-2011 մրցանակաբաշխության հաղթողները, իսկ երեկ մեկնարկել է start up weekend-ը, որը գերազանցել է կազմակերպիչների ակնկալիքները. «Ակնկալում էինք 5 թիմ, բայց ձևավորվել է 9 թիմ: Շատ պայծառ գլուխներ են հավաքվել»:
Armnet Awards-2011-ի ժյուրիի նախագահ Սամվել Մարտիրոսյանը հայտնեց, որ կայքերի ակտիվությունն այս տարի քիչ ավելի է, քան անցած տարի՝ 500-ի փոխարեն մոտ 600 կայք է ներկայացվել. «Շատ նոր կայքեր կան, շատ հներ չկան, կազմն ընդհանուր փոխվել է: Ամենաշատը առաջադրվել են կայքեր կոնտենտի տեսանկյունից և ամենաքիչը՝ դիզայնի: Մեզ մոտ արտաքին տեսքին հետևող շատ լավ կայքերը քիչ են»:
Ս. Մարտիրոսյանը նաև նշեց, որ այս տարի sms-ով քվեարկողների թիվը կտրուկ ընկել է, քանի որ sms-ները վճարովի են, ինչը թույլ է տալիս շրջանցել լցոնումները:
Orange Armenia-ի գլխավոր տնօրեն Բրունո Դյութուան նշեց, որ քվեարկության ձևը փոխվել է, որպեսզի առավել արդար լինի և բացառվի նախորդ տարվա պրակտիկան, երբ բազմաթիվ էին կրկնակի քվեարկումները:
Հավելենք, որ sms քվեարկությունները շարունակվելու է մինչև ժամը 18:00:
