Խորհրդատվական առաքելությամբ Հայաստանում գտնվող փորձագիտական խմբին ընդունել է պաշտպանության նախարար Սեյրան Օհանյանը:
Պաշտպանության նախարարության տեղեկատվության և հասարակայնության հետ կապերի վարչության այսօր տարածած հաղորդագրության համաձայն` ներկայացնելով ռազմական կրթության բնագավառում պաշտպանության նախարարության կողմից վարվող քաղաքականությունը` Սեյրան Օհանյանը նշել է այդ ուղղությամբ իրականացված բարեփոխումները, ինչպես նաև դրանց արդյունքում ստեղծված Հայաստանի Հանրապետության ռազմական կրթության հայեցակարգի նախագծի առանձնահատկությունները: Կարևորելով ռազմական կրթության ոլորտում ՆԱՏՕ-ի հետ համագործակցությունը` Սեյրան Օհանյանը նշել է, որ այն բխում է Հայաստանի ռազմական կրթության հայեցակարգը կյանքի կոչելու համար փորձագիտական խորհրդատվության անհրաժեշտությունից և Հայաստանի կողմից վարվող թափանցիկ պաշտպանական քաղաքականության տրամաբանությունից:
Փորձագիտական խմբի անդամները բարձր են գնահատել ռազմական կրթության ոլորտում վերջին տարիներին Հայաստանում կատարված աշխատանքները, որոնց արդյունքում 2011 թ. կգործի Հայաստանի Հանրապետության ռազմական կրթության հայեցակարգը` միջազգային չափանիշներով կանոնակարգելով ռազմական կրթության համակարգը: