2008 թ. Քոբի Բրայանտը բարձրաձայնում էր Դարֆուրի ցեղասպանության խնդիրը` կոչ անելով դադարեցնել այն, սակայն այսօր նա ստորագրել է պայմանագիր` ներկայացնելու համար Թուրքիայի Հանրապետությունը, մի երկիր, որը հերքում է Դարֆուրի ցեղասպանությունը և տխրահռչակ հանցագործն է 20-րդ դարի առաջին Ցեղասպանության:
2008 թ. մայիսի 27-ին Քոբին հայտարարություն էր արել լոսանջելոսյան «Օգնության կարիք կա» կազմակերպության միջոցով` կոչ անելով միավորել ջանքերը` Դարֆուրի ցեղասպանությունը դադարեցնելու համար:
«Դարֆուրում հարյուր հազարավոր մարդիկ սպանվել են, խեղվել են, ընտանիքները բաժանվել են: Խնդրում եմ, կանգնե՛ք մեր կողքին: Մենք ուժ ունենք կյանքեր փրկելու, կյանքեր վերականգնելու»,- ասել է Բրայանտը Youtube-ում: «Եթե մենք կարողանանք միավորել մարդկանց, որոնք ցանկանում են պայքարել, ապա հրաշքը տեղի կունենա»,- ասել է նա:
«Ասպարէզը» հիշեցնում է, որ 2003 թ. Սուդանի կառավարությունը Դարֆուրում սպանեց կես միլիոն մարդ, ավելի քան 3 միլիոնը զրկվել են իրենց բնակարաններից: Սուդանի կառավարությունը, ինչպես և Թուրքիայի Հանրապետությունը, հերքում են ցեղասպանությունը:
Թուրքիան Սուդանի այն դաշնակիցների շարքում է, որոնք քողարկում են այս հարցը և Սուդանի կառավարությանը զենքով են ապահովում, մի կառավարություն, որը գլխավորում է Օմար Ալ Բաշիրը. Նա Միջազգային քրեական դատարանի կողմից հայտարարվել է միջազգային հետախուզման մեջ:
Թերթը նաև գրում է, որ 2009 թ. նոյեմբերին, չնայած միջազգային հանրության բողոքներին` չհյուրընկալել Ալ Բաշիրին, Թուրքիայի վարչապետը Ռեջեփ Թայիփ Էրդողանը նույնիսկ պաշտպանեց իր դաշնակցին` մերժելով ձերբակալել Ալ Բաշիրին (թերթը մոռանում է նշել, որ, այնուամենայնիվ, այդ ճնշումներից հետո Ալ Բաշիրը չի այցելել Թուրքիա.- խմբ.) և հերքելով Դարֆուրի ցեղասպանությունը:
Էրդողանի խոսքերով, Դարֆուրում ոչ մի ցեղասպանություն էլ չի եղել, միջազգային պահանջները նրա ձերբակալության վերաբերյալ «սխալ են», և Բաշիրը ուղղակի սխալ է կառավարել իրավիճակը (ինչն էլ հանգեցրել է սպանությունների.- խմբ.):
2010 թ. վերջին Բրայանտը կրկին հայտնվեց նորությունների վերնագրերում: Այս անգամ նա հանդես է գալիս ոչ թե որպես Ցեղասպանության դեմ բողոքող, այլ երկու ցեղասպանությունները մերժողների աջակից:
Այս շաբաթ Քոբին ստորագրել է երկու տարվա պայմանագիր Թուրքիայի ազգային ավիափոխադրողի հետ` դառնալով աշխարհում նրա «դեսպանը», ընկերության դեմքը:
Այս որոշումը հարուցել է Ամերիկայի հայերի բուռն դժգոհությունը, իսկ Հայկական երիտասարդական ֆեդերացիան բողոքի ակցիաներ է սկսել նրա դեմ` կոչ անելով վերհիշել Դարֆուրը և չպաշտպանել ցեղասպանությունները հերքողներին:
Ըստ այդ կազմակերպության ներկայացուցիչ Գասպար Ջիվալեջյանի՝ սա բացասաբար է ազդում երիտասարդության վրա, որոնք հետևում են Քոբիին: «Քոբին միայն բասկետբոլիստ չէ, նա տեղական, ազգային և համամարդկային դերակատարություն ունի` դրական օրինակ ցույց տալով միլիոնավոր մարդկանց, որոնք հետևում և աջակցում են նրան»,- ասել է Ջիվալեջյանն` ավելացնելով, որ «նա վատ խաղ ցուցադրեց, ստորագրելով այդ պայմանագիրը Ցեղասպանության հանցագործների հետ»:
Աերիկահայերը նաև հույս են հայտնում, որ այս չափազանց շահութաբեր գործարքը նա կբալանսավորի բարոյական նորմերի հետ:
Թուքական ավիաուղիները «United Airlines»-ին (ամերիկյան խոշորագույն մասնավոր ավիաընկերություն է.- խմբ.) նման չէ: Թուրքական այդ ընկերության բաժնետոմսերի 49%-ը պատկանում է մի կառավարության, որը հերքում է Հայոց ցեղասպանությունը: Նրանք աջակցում են, օրինակ, լոբբիստական այնպիսի կազմակերպության, ինչպիսին է Ամերիկայի թուրքական խորհուրդը, որն աշխատում է Հայոց Ցեղասպանության ճանաչման գործընթացի դեմ,- ասում է Ջիվալեջյանը: