ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ արտգործնախարար Էդվարդ Նալբանդյանը դեկտեմբերի 1-2-ը Փարիզում մասնակցել է Ֆրանկոֆոնիայի միջազգային կազմակերպության (ՖՄԿ) նախարարական համաժողովին:
ՖՄԿ նախարարական հանդիպմանը մասնակցել են ազմակերպության 70 անդամ, ասոցացված և դիտորդ երկրների պատվիրակությունները:
Նախարարական համաժողովի օրակարգում եղել է 2010թ. հոկտեմբերին կայացած Մոնտրոյի գագաթաժողովին ընդունված որոշումների իրականացման ընթացքը:
Հայաստանի արտգործնախարարն իր ելույթում կարևորել է Ֆրանկոֆոնիայի շրջանակում համագործակցությունը և կազմակերպության դերը բազմամշակութային երկխոսության միջոցով ժողովուրդների և երկրների միջև համերաշխության ամրապնդման գործում:
Իր խոսքում Հայաստանի արտգործնախարարը ներկայացրել է կազմակերպության նպատակների իրագործման ուղղությամբ Հայաստանի կողմից ձեռնարկվող քայլերը, Երևանում կայացած Ֆրանկոֆոն քաղաքապետերի միջազգային ասոցիացիայի գլխավոր ասամբլեայի արդյունքները:
Շվեյցարիայի Համադաշնության նախագահ, արտաքին գործերի դաշնային դեպարտամենտի տնօրեն Միշլին Կալմի-Ռեյի հետ հանդիպմանը երկուստեք գոհունակություն է հայտնվել այս տարի երկկողմ հարաբերություններում արձանագրված զգալի առաջընթացով։
Է. Նալբանդյանն ու Մ. Կալմի-Ռեյը նշել են, որ հաճախակի հանդիպումները հնարավորություն են ընձեռում մշտապես հետևել նախորդ հանդիպումներին ձեռք բերված պայմանավորվածությունների կատարման ընթացքին և նախանշելու նոր քայլեր:
Հայաստանի արտաքին քաղաքական գերատեսչության ղեկավարը հանդիպել է նաև ՖՄԿ գլխավոր քարտուղար Աբդու Դիուֆի հետ:
Զրուցակիցները քննարկել են Ֆրանկոֆոնիայի միջազգային կազմակերպության օրակարգին առնչվող հարցերի լայն շրջանակ:
Ա. Դիուֆն ընդգծել է, որ Հայաստանի հետ կազմակերպության հարաբերությունները նշանակալի զարգացում են ապրել 2008թ. ասոցացված անդամի կարգավիճակով Հայաստանի անդամակցությունից ի վեր: