Այսօր ԵԱՀԿ երևանյան գրասենյակի և ԵԱՀԿ ժողովրդավարական հաստատությունների ու մարդու իրավունքների գրասենյակի կողմից կազմակերպված միջոցառմանը ներկա էին հայաստանյան կուսակցությունների կին ներկայացուցիչները, ինչպես նաև արտերկրից հրավիրված հյուրեր, ՀԿ ներկայացուցիչներ:
Կլոր սեղանի նախագահողներն էին ԵԱՀԿ երևանյան գրասենյակի ղեկավար Կարել Հոֆստրան և ԵԱՀԿ⁄ԺՀՄԻԳ ծրագրի պատասխանատու դոկտոր Դիանա Դիգոլը: Կարել Հոֆստրան կարևորեց կնոջ դերը առողջ ժողովրդավարական հասարակության և կայուն համակարգերի զարգացման գործում:
«Խորհրդարանական ընտրություններին ընդառաջ` ԵԱՀԿ-ն աշխատում է աջակցել երկրին` ազատ և արդար ընտրություններ ապահովելու հարցում»,- նշեց նա ու հավելեց, որ անհրաժեշտ է հնարավորություն տալ, որպեսզի կանայք հավասարապես լիարժեք մասնակցեն այս գործընթացին:
Միջոցառման ընթացքում հարց ու պատասխանի միջոցով քննարկեցին, թե ինչպես կարելի է բարձրացնել կնոջ մասնակցությունը քաղաքական կյանքում, ինչպես նաև անդրադարձան կանանց` որպես առաջնորդների, որոշում կայացնողների և թեկնածուների առաջ քաշելու լավագույն պրակտիկային:
Մասնակից հայ կանայք խոսեցին այս տարիների ձեռքբերումների ու բացթողումների մասին: Հնչեցին տարաբնույթ կարծիքներ: Դիանա Դիգոլը ներկայացրեց «գենդերային հավասարությունը ընտրված պաշտոնում, վեց քայլից բաղկացած գործողությունների ծրագիրը», որտեղ ներկայացվեցին Հայաստանում քաղաքացիական և քաղաքական մասնակցության գենդերային հարթության թեմային առնչվող սոցիոլոգիական ուսումնասիրություններ:
