Երկրաշարժերի կանխումն այսօրվա դրությամբ հնարավոր չէ, հետևաբար պետք է կարողանանք գոնե որոշակի մեղմացնող աշխատանքներ տանել: Այսօր կայացած մամուլի ասուլիսում այս մասին հայտարարեց սեյսմոլոգ Վլադիմիր Բալասանյանը:
Ասուլիսին ներկա ԱԻՆ Սեյսմիկ պաշտպանության ազգային ծառայության պետի տեղակալ Աշխեն Թովմասյանն իր հերթին նկատեց, որ Հայաստանում մարդկանց երկրաշարժերից պաշտպանվել սովորեցնում են դեռ 1991 թվականից, և արդյունքներն այս առումով բավական տպավորիչ են:
«Միաժամանակ, բացթողումներ, իհարկե, մնում են: Ուսուցման արդյունավետությունը որոշվում է միայն երկրաշարժերից հետո»,- նկատեց նա:
Ճարտարապետների միության նախագահ Մկրտիչ Մինասյանն իր հերթին կարևորեց քաղաքաշինության մեջ անվտանգության նորմերի պահպանման խնդիրը:
«Բայց երբ անհարկի խտությամբ շենքեր ենք կառուցում, վտանգում ենք մարդկանց կյանքը: Այդ շենքերը երկրաշարժերի ժամանակ կարող են մահաբեր լինել բնակչության համար: Պետությունը երբեմն չգիտի`ինչ է անում, և առանց բնակիչների դիմակայության մինչև հիմա կարող էին անհարկի խտությամբ բազմաթիվ շենքեր կառուցվել: Բնակիչը պետք է պայքարի իր յուրաքանչյուր ք|մ-ի համար: Սպիտակի երկրաշարժից հետո, թվում է, մենք պետք է դասեր քաղեինք, զգուշանայինք, սակայն շարունակում ենք չպահպանել շինարարության նորմերը. մենք Սպիտակի երկրաշարժից դասեր չենք քաղել»,- նկատեց նա:
Մկրտիչ Մինասյանը նաև նկատեց, որ Երևանի շենքերի վերանորոգման աշխատանքներ չեն կատարվում, ինչպես ընդունված է ողջ աշխարհում:
«Նոր բնակֆոնդ ստեղծելը շատ ծախսատար է, հետևաբար պետք է շուտափույթ միջամտություն ցուցաբերել արդեն կառուցված հին շենքերի նկատմամբ: Վտանգված են նաև մեր մշակութային օջախները: Շինությունն օրգանիզմ է, որին ամենօրյա ուշադրություն է պետք»,- ասաց նա:
ԱԻՆ Սեյսմիկ պաշտպանության ազգային ծառայության պետի տեղակալ Աշխեն Թովմասյանն էլ նշեց, որ անհատի կամ մասնավորի մակարդակով իսկապես դասեր չեն քաղվել:
«Շենքերում մասնավոր կառուցողների կողմից կատարվում են կամայական ձևափոխումներ: Ձևափոխումներ կատարում են անգամ իրենք` բնակիչները, երբ նկուղները վերածում են այլ տարածքների»,- նշեց նա:
Սեյսմոլոգ Վլադիմիր Բալասանյանը, անդրադառնալով «Մոսկվա» կինոթատրոնի մերձակայքում իրանցիների կողմից կառուցվելիք աշտարակի կառուցմանը, նշեց, որ դեմ է այդ նախագծին, և կասկածի տակ դնելով կառուցման նորմերի պահպանման հարցը` նկատեց, որ բնական աղետի դեպքում այն պարզապես փլատակների կվերածի Թումանյան, Աբովյան փողոցները: «Երևան քաղաքի միկրոշրջանացման քարտեզը թերի է»,- ամփոփեց նա:
