Երեկ երեկոյան տեղի ունեցած ՀՀԿ գործադիր մարմնի և խորհրդի նիստերը կարճ են տևել: Սերժ Սարգսյանի կողմից եղել են առաջադրումներ. ԱԺ նախագահի պաշտոնում առաջադրվել է Սամվել Նիկոյանի թեկնածությունը, փոխնախագահի պաշտոնում` ՀՀԿ մամուլի քարտուղար Էդուարդ Շարմազանովի թեկնածությունը, առաջադրումները միաձայն հաստատվել են գործադիր մարմնի և խորհրդի նիստերում: Այսօր կայացած մամուլի ասուլիսում այս մասին հայտարարեց ՀՀԿ փոխնախագահ Ռազմիկ Զոհրաբյանը:
«Սամվել Նիկոյանը տիրապետում է ԱԺ կազմակերպչական բոլոր նրբություններին և այսօր շատ հանգիստ կարող է Հայաստանն արտերկրում ներկայացնել որպես ԱԺ նախագահ: Նա շատ նորմալ կարող է ներկայացնել Հայաստանը: ՀՀԿ-ն քաղաքական գործիչների դպրոց է, դարբնոց: Ինչ վերաբերում է Շարմազանովին, ապա նա շատ կարճ ժամկետում կարողացավ ինքնադրսևորվել: Նա կարողացավ անել դա և ներկայացվեց ԱԺ փոխխոսնակի պաշտոնում: Գագիկ Մելիքյանը, ում երեկվա գործադիր նիստում Սերժ Սարգսյանն առաջադրել է Էդուարդ Շարմազանովի նախկին պաշտոնում, ևս աշխատանքային լուրջ փորձ ունի»,- նկատեց ՀՀԿ փոխնախագահը:
Խոսելով Սամվել Նիկոյանի մասին` որպես Մարտի 1-ի գործով խորհրդարանական ժամանակավոր հանձնաժողովի նախագահ, ՀՀԿ-ական գործիչը նկատեց. «Կարծում եմ, որ նա նորմալ է տարել աշխատանքները, ինչ հնարավոր է եղել բացահայտել` բացահայտվել է, ինչ ոչ` ոչ»:
Զոհրաբյանի տեղեկացմամբ` ԱԺ նախկին նախագահը ևս մասնակցել է երեկ կայացած ՀՀԿ գործադիր մարմնի և խորհրդի նիստերին և կողմ է քվեարկել առաջադրումներին:
«Արդար, թափանցիկ ընտրությունների համար կազմակերպչական լուրջ աշխատանքներ են անհրաժեշտ, դրա համար էլ Հովիկ Աբրահամյանը թողեց իր պաշտոնը` աշխատելու ՀՀԿ շտաբի պետի պաշտոնում: Միաժամանակ, ՀՀԿ նախընտրական շտաբը դեռ չի գործում, սակայն կազմակերպչական աշխատանքներն ընթացքի մեջ են»,- ասաց նա: