Արցախի եվրոպական շարժումն այսօր տարածել է հաղորդագրություն, որով ողջունում է Հարավային Օսեթիայի նախագահի ընտրություններում Ալլա Ջիոևայի հաղթանակը: Կազմակերպությունը հաղթանակի կապակցությամբ շնորհավորել է նորընտիր նախագահին և հույս հայտնել, որ նրա պաշտոնավարության ընթացքում երկրում կդադարեն լրագրողների և քաղաքացիական հասարակության ներկայացուցիչների հալածանքները:
Կազմակերպությունը նաև կոչ է արել արդեն նախկին նախագահ Էդուարդ Կոկոյտիին դադարեցնել ժողովրդավարության դեմ կատարվող գործողությունները և հարգել սեփական ժողովրդի ընտրությունը, շնորհավորել հաղթած թեկնածուին և նախադեպ ստեղծել Հարավային Կովկասի ժողովրդավարացման համար:
Արցախի եվրոպական շարժումը Արցախում գործող հասարակական կազմակերպություն է, որը ստեղծվել է 2010 թ. ապրիլին՝ մի խումբ երիտասարդների կողմից։ Կազմակերպության նպատակն է աջակցել ԼՂՀ և եվրոպական երկրների ու կառույցների միջև հարաբերությունների զարգացմանը։