Հայաստանում կոռուպցիայի նվազեցում չի նախատեսվում: «Առաջին լրատվական»-ի հետ զրույցում նման տեսակետ հայտնեց իրավապաշտպան Միքայել Դանիելյանը`գնահատելով Հայաստանում կոռուպցիոն ռիսկերի մակարդակը և ամենակոռումպացված ոլորտները:
Ըստ իրավապաշտպանի`բոլոր ոլորտներում կոռուպցիոն ռիսկը շատ բարձր է: Մ. Դանիելյանի համոզմամբ` այդ ոլորտներն են ոստիկանությունը, պետական մարմինները, բանակը, սոցիալ-կրթական հաստատությունները:
«Քանի որ ես գործ ունեմ մարդու իրավունքների հետ, նաև կարող եմ ասել, որ ոստիկանությունում և դատախազությունում է կոռուպցիայի ամենաբարձր ցուցանիշը»,- մեկնաբանեց իրավապաշտպան Միքայել Դանիելյանը:
Հիշեցնենք, որ Transparency International միջազգային կազմակերպությունը հրապարակել է աշխարհի 183 երկրներում կոռուպցիայի դրսևորման ամենամյա վարկանիշային աղյուսակը, ըստ որի՝ Հայաստանը ունեցած 2,6 բալով նահանջել է 6 կետով՝ նախկին 123-րդ հորիզոնականից իջնելով 129-րդ: