Ամանորին կարծես այնքան էլ շատ ժամանակ չի մնացել, ու ամանորյա շունչն զգացվում է ամենուր: Փոքրիկների համար առաջին հերթին այն տոն է, որն սկսվում է մանկական ներկայացումներով:
Երևանյան թատրոններն արդեն պատրաստել են իրենց ամանորյա ներկայացումները ու սպասում են երեխաներին:
Եվ այսպես, տեսնենք, թե ինչ ներկայացումներ կարող են դիտել փոքրիկները թատրոնների բեմերում:
Երևանի պետական կամերային թատրոնում երեխաները կարող են դիտել Շառլ Պերոյի «Մոխրոտը» մանկական զվարճալի ներկայացումը:
Երևանի Հ. Թումանյանի անվան պետական տիկնիկային թատրոնում փոքրիկները կարող են դիտել «Այս տարվա հեքիաթը և բարի վիշապը» ամանորյան ներկայացումը, Հ. Պարոնյանի անվան երաժշտական կոմեդիայի պետական թատրոնում` «Ոսկի քաղաքը»:
Կ. Դեմիրճյանի անվան մարզահամերգային համալիրում երեխաները կարող են դիտել Սանկտ Պետերբուրգի պետական մանկական սառցե թատրոնի «Շչելկունչիկ» բալետ-հեքիաթը (ըստ Է. Տ. Հոֆմանի «Մարդուկ-ջարդուկը և մկների թագավորը» ստեղծագործության, երաժշտությունը` Պ. Ի. Չայկովսկու) և «Ձյունե թագուհին» ներկայացումը (ըստ Հ. Ք. Անդերսենի «Կայն ու Գերդան» հեքիաթի):
Բացի այդ` երեխաները կարող են դիտել Սանկտ Պետերբուրգի պետական մանկական սառցե թատրոնի` հայկական սիրված երգերի հիման վրա բեմադրած «Սառցե մանրապատումներ» շարքը: