Բանակում դաժան ծեծի հետևանքով մահացած վանաձորցի Գևորգ Կոծինյանի մահվան համար Սյունիքի մարզի ընդհանուր իրավասության դատարանը գործով մեղադրվող չորս զինծառայողներին մեղավոր է ճանաչել: Շարքայիններ Տարոն Սուվարյանին և Վահե Աղաջանյանին դատարանը 11 տարվա, իսկ կրտսեր սերժանտ Մարգար Դավթյանին 11.5 տարվա ազատազրկման է ենթարկել: Իսկ ավագ լեյտենանտ Արմեն Ռաֆայելյանին դատարանը ենթարկել է երեք տարվա ազատազրկման ու Ազգային ժողովի այս տարվա համաներման մասին որոշմամբ դատարանի դահլիճից ազատ է արձակել:
3 զինվորները, ովքեր մահվան են հասցրել Կոծինյանին, պատժվեցին ոչ թե սպանության համար, այլ զինծառայողների միջև կանոնագրքային հարաբերությունները խախտելու ու զինվորի առողջությանը մարմնական վնասվածք հասցնելու համար: Իսկ դատարանի դահլիճից ազատ արձակված ավագ լեյտենանտը պատժվեց անգործության համար: Վերջինս, ըստ քրեական գործի, տեսնելով, որ երեք զինվորները ալկոհոլային խմիչք են օգտագործում, չէր կանխել այն, մինչդեռ զորամասում խմիչքն արգելվում է, ու լեյտենանտը պարտավոր էր կանխել դրա օգտագործումը: Արդեն խմիչքի ազդեցության տակ գտնվող զինվորներն էլ, վիճաբանելով Կոծինյանի հետ, նրան այնքան էին ծեծել, որ նա տեղում մահացել էր:
Զինվորի հարազատները դժգոհ են դատարանի որոշումից: Մորեղբայր, տուժողի իրավահաջորդ Բորիս Ադամյանն «Ազատություն» ռադիոկայանի հետ զրույցում ասել է, որ նոյեմբերի 13-ին հրապարակված դատարանի վճիռը բողոքարկելու են Վերաքննիչ քրեական դատարան: Նա գտնում է, որ դատարանը նրանց պետք է դատեր սպանության համար:
Տուժողի հարազատները ահմանված պատժաչափը չեն վիճարկում: Նրանք նպատակ ունեն ամրագրել Կոծինյանի կյանքի իրավունքի խախտման փաստը և պետության կողմից ստանալ 5 միլիոն դրամի չափով բարոյական փոխհատուցում:
Այս գործով փաստաբան Կարեն Թումանյանն «Ազատություն» ռադիոկայանին ասել է, թե ընդհանուր իրավասության դատարանը, գտնելով, որ զինվորները հանցագործություն են կատարել, միևնույն ժամանակ չի ամրագրել, որ այդ հանցագործությամբ խախտվել է Կոծինյանի կյանքի իրավունքը:
Փաստաբան Էդմոն Մարուքյանն էլ գտնում է, որ «կյանքի իրավունքի խախտման» սահմանման դեպքում այս երևույթը կդառնա նախադեպային` ազդելով նաև բանակում մահվան դեպքերի նվազման վրա:
Կոծինյանի իրավահաջորդի բողոքը մեկ ամսվա ընթացքում կներկայացվի Վերաքննիչ դատարան: