Հաջորդ տարի Պետական եկամուտների կոմիտեի հարկային մարմիը ստուգելու է 2386 ընկերությունների: Դրանց ցանկը հրապարակված է ՊԵԿ-ի կայքում: Ինչպես «Առաջին լրատվական»-ին հայտնեցին ՊԵԿ-ի լրատվական ծառայությունից, Հայաստանում գործող բոլոր ընկերությունների տվյալները մուտք են արվել համակարգչային հատուկ ծրագիր, որն էլ գաղտնի մեթոդաբանությամբ ընտրել է ստուգման ենթակա ընկերությունները:
Ըստ այդ համակարգչային տրամաբանության՝ Գագիկ Ծառուկյանին պատկանող ձեռնարկություններից ստուգման ենթակա են համարվել «Արարատցեմենտ», «Կլեոպատրա», «Երևանի «Արարատ» գինու, կոնյակի, օղու կոմբինատ» ընկերությունները, բայց ռիսկային կարմիր գոտում չեն հայտնվել «Մուլտի գրուպ սթոուն», «Արգեյմ», «Երևանի քիմիադեղագործական ֆաբրիկա», «Բաղրամյանի հացամթերքներ», «Մուլտի գոլդ» և շատ այլ ընկերություններ:
Նույն «խտրական վերաբերմունքն» է դրսևորվել նաև Սամվել Ալեքսանյանին պատկանող ընկերությունների պարագայում: Այսպես, հաջորդ տարի հարկային տեսուչներին կհյուրընկալեն «Նատալի Ֆարմ», «Փարվանա», «Ալեքս Գրիգ», ընկերությունները, իսկ «Երևան-Սիթի» խանութների ցանցը, Ախուրյանի շաքարի գործարանը, «Ֆլիտֆուդ» և մյուս ընկերությունները կզրկվեն այդ «հաճույքից»:
Հարկային տեսուչների ներկայությունից զուրկ կլինեն նաև Տիգրան Արզաքանցյանին պատկանող ընկերությունները: Համենայնդեպս, ՊԵԿ ցուցակում դրանք գտնել չհաջողվեց:
Խոշոր հարկ վճարողների ցուցակի առաջին տասնյակից հաջորդ տարի ստուգման ենթակա են բոլոր ընկերությունները, բացի երկուսից` «Ֆլեշ»-ից և «Հայաստանի էլեկտրական ցանցեր»-ից:
