Հայ ազգային կոնգրեսը մոնոլիտ կառույց է, և նրա ներսում ոչ մի վատ բան, ի դեմս պառակտման, չի կարող լինել: «Առաջին լրատվական»-ի հետ զրույցում նման տեսակետ հայտնեց ՀԱԿ ներկայացուցիչ Գուրգեն Եղիազարյանը՝ պատասխանելով այն հարցին, թե կարո՞ղ է Լևոն Տեր-Պետրոսյանի և ՀԱԿ անդամ կուսակցությունների ղեկավարների՝ ԲՀԿ հետ հնարավոր համագործակցության շուրջ անհամաձայնությունը պառակտման հանգեցնել:
«ՀԱԿ-ը հաստատակամ առաջ է գնում, և իշխանափոխությունը սարերի հետևում չէ: Ինչ վերաբերում է ԲՀԿ հետ հնարավոր համագործակցությանը, ապա նման հարցերը որոշվում են քաղխորհրդում՝ ձայների պարզ մեծամասնությամբ, դա քվեարկության արդյունքից է կախված, իսկ ՀԱԿ-ում տրոհումներ չկան, մենք մեկս մյուսին հարգում ենք»,- նկատեց Գուրգեն Եղիազարյանը:
Հարցին՝ կիսո՞ւմ է տեսակետը, որ ՀՀԿ-ն ԲՀԿ հանդեպ բացահայտ ճնշումներ է իրականացնում, ՀԱԿ ներկայացուցիչը նկատեց. «ՀՀԿ-ի նման գործելաոճը հայտնի է, ճնշումներ կան, և եթե ԲՀԿ հանդեպ այդ ճնշումները մի քիչ էլ շարունակվեն, այդ կուսակցությունը շուտափույթ կգնա ՀՀԿ հետ համաձայնության՝ տեղի տալով վերջինիս»:
