Հինգշաբթի օրը վաճառքի է հանվել լրագրող Միշել Թաուբմանի «ԴՍԿ-ի (Դոմինիկ Ստրոս Կան-1in.am) գործը. երկրորդ հետաքննություն» գիրքը, որում Արժույթի միջազգային հիմնադրամի նախկին տնօրենը հավաստիացնում է, որ Նյու Յորքի հյուրանոցի սպասուհին եղել է իր դեմ հյուսված դավադրության մի մասը՝ Ֆրանսիայի նախագահի պաշտոնում իր ընտրվելը տապալելու համար:
Ստրոս Կանի կենսագրի գրքում նշվում է, որ Նաֆիսսատու Դիալոն «չափազանց գրավիչ է նայել» Ստրոս Կանին, երբ վերջինս մերկ դուրս է եկել լոգարանից, և դա նրան թվացել է «հրավերի» նշան:
Ինչպես հաղորդում է BBC-ն, այս գիրքը կլինի առաջին մանրամասն և հասանելի «զեկույցը»՝ մայիսի 14-ին Նյու Յորքի հյուրանոցում տեղի ունեցած դեպքի մասին:
Գրքում ասվում է, որ Ստրոս Կանը սպասուհուն համարում է իր դեմ հյուսված դավադրության գործիք՝ նախագահական ընտրություններին մասնակցելու իր ծրագրերը տապալելու համար: Նա նաև հավաստիացնում է, որ սպասուհին, ամենայն հավանականությամբ, սենյակից դուրս գալիս գողացել է իր հեռախոսը:
Հեղինակն ասել է, որ գիրքը հիմնված է Ստրոս Կանի 6 հարզացրույցների և հետաքննությունից ստացված տվյալների վրա:
Դիալոյի փաստաբանները գիրքը համարել են «անհեթեթություն» և «ամբողջությամբ հնարված»:
Նշենք, որ Ստրոս Կանը համարվում էր Ֆրանսիայի նախագահի պաշտոնի հիմնական հավակնորդներից մեկը: Այն բանից հետո, երբ Մանհեթենի դատարանը փակեց նրա դեմ դատական գործընթացը, ֆրանսիացիների վստահությունը նրա նկատմամբ սկսեց աճել: