Հանրային քննարկումներ, միջոցառումներ, ֆիլմերի դիտումներ, տեղեկատվական դասընթացներ դպրոցներում. սա է այն միջոցառումների շարքը, որն իրականացվում է երիտասարդների շրջանում: Այս մասին «Առաջին լրատվական»-ի հետ զրույցում տեղեկացրեց «Տեղեկատվություն և գիտելիքի կարիք» ՀԿ նախագահ Մամիկոն Հովսեփյանը`խոսելով ՁԻԱՀ հիվանդության կանխարգելմանն ուղղված աշխատանքների շուրջ:
«Մենք հիմնականում շեշտը դնում ենք հանրային իրազեկման վրա, դասընթացներ ենք կազմակերպում հիմնականում երիտասարդների համար, ինչպես Երևանում, այնպես էլ մարզերում` քննարկումներ, ֆիլմերի դիտումներ, հանրային միջոցառումներ, տարվա ընթացքում կազմակերպում ենք նաև այլ հանրային միջոցառումներ»,- նշեց Մ. Հովսեփյանը` հավելելով, որ հիմնական նպատակներից մեկը հենց սեռավարակների կանխարգելումն է, սեռական առողջության վերաբերյալ տեղեկատվության տրամադրումը:
Նրա համոզմամբ` այս բնագավառում պետք է գործունեություն ծավալել երիտասարդների շրջանում, քանի որ երիտասարդներն ավելի խոցելի են: Ըստ նրա`15-18 տարեկան պատանիներն ավելի քիչ տեղեկացված են և միշտ ձգտում են տեղեկատվություն ստանալ, իսկ երբ սխալ աղբյուրներից են տեղեկատվություն ստանում, այն ճակատագրական է դառնում: «Իսկ 27 տարեկանն այն տարիքին է, երբ մարդը կարող է ընտանիք ձևավորել` վերարտադրողական տարիքն է, ու այդ տարիքում նույնպես սեռավարակները լուրջ խնդիրներ կարող են հանդիսանալ ընտանիքի պլանավորման, սերնդի զարգացման վրա»,- ամփոփեց Մ. Հովսեփյանը: