Այսօր լրագրողների ներկայությամբ ՀՌԱԿ հանրապետական վարչության ատենապետ Էդվարդ Անտինյանը և Արմենական-ՌԱԿ հանրապետական վարչության ատենապետ Հակոբ Ավետիքյանը ստորագրեցին միավորման հուշագիր:
Հուշագրում մասնավորապես ասված է, որ ՀՌԱԿ և Արմենական-ՌԱԿ կուսակցությունները, հանդիսանալով Ռամկավար Ազատական գաղափարախոսության և արժեքների կրողները, հայտարարում են, որ սկսում են միավորման գործընթաց, որի նպատակն է ընդմիշտ վերջ տալ տարիներով ձգվող պառակտմանը և ստեղծել միասնական կուսակցություն, կազմում են կուսակցությունների միավորման գործընթացի տեխնիկական և հարակից խնդիրները կարգավորող ժամանակավոր հանձնախումբ`երկու կուսակցությունների ատենապետերի ղեկավարությամբ:
Հուշագրում նաև նշված է, որ կոչ են անում բոլոր կուսակցական ընկերներին և կառույցներին սատարել, նպաստել և մաս կազմել այս միավորմանը, կարևորելով ՌԱԿ սփյուռքյան կառույցների դերը, կոչ են անում նրանց Հայաստանի օրինակով սկսել վերամիավորման գործընթաց, նաև դառնալով հայաստանյան կառույցների միավորման ուղղակի մասնակիցն ու աաջակիցը, նաև հրավիրում են գործող լիբերալ-դեմոկրատական գաղափարախոսությունը դավանող կուսակցություններին միանալ այս նախաձեռնությանը:
Հուշագրի ստորագրման ավարտին, երկու կողմերը տեղեկացրին, որ միավորումը ենթադրում է պարտադիր ընթացակարգ, և այն կարող է տևել որոշակի ժամանակահատված, որից հետո կողմերը կմշակեն միասնական մոտեցում`թե քաղաքական կուրսի ընտրության, թե այլ կուսակցությունների հետ գործընկերային հարաբերությունների հաստատման և թե առաջիկա ընտրությունների հարցում:
Բանախոսները համոզված են, որ նախաձեռնության արդյունքում ՀՀ-ում կստեղծվի իրապես մեկ, միասնական և ամբողջական Ռամկավար Ազատական կուսակցություն, որը կդառնա Վանում հիմնադրված Արմենական և Կ.Պոլսում գաղափարակից կուսակցությունների հենքի վրա միավորված Ռամկավար Ազատական կուսակցություն գաղափարախոսության, քաղաքական հավատամքի և նրա ավանդույթների շարունակողն ու զարգացնողը:
