2010 թ. դրությամբ աշխարհում կար 34 մլն ՄԻԱՎ վարակակիր մարդ. նրանց գերակշիռ մասը`22,9 մլն, բնակվում էր Աֆրիկայում՝ Սահարայից հարավ ընկած տարածքում, իսկ Արևելյան Եվրոպայի և Կենտրոնական Ասիայի տարածաշրջանում, որի մեջ մտնում են նաև Հայաստանը և նախկին Խորհրդային Միության հանրապետությունները, ՄԻԱՎ վարակակիր մարդկանց թիվը հասել է 1,5 մլն-ի, ինչը ավելի քան 3,5 անգամ ավելի է 2001 թ. համեմատ:
2010 թ. ընթացքում մոտ 2,7 մլն մարդ է վարակվել ՄԻԱՎ-ով, նրանցից 160 հազարը`մեր տարածաշրջանում: Դա ավելի քան 5 անգամ գերազանցում է Արևմտյան և Կենտրոնական Եվրոպայում և մոտ 3 անգամ` Հյուսիսային Ամերիկայում նոր դեպքերի թվին:
2010 թ. ընթացքում ՄԻԱՎ-ով վարակվել է 390 հազար երեխա:
2010 թ. ընթացքում ՁԻԱՀ-ից մահացել է մոտ 1,8 մլն մարդ, նրանցից 90 հազարը՝ մեր տարածաշրջանում:
2010 թ. դեկտեմբերի դրությամբ ՄԻԱՎ-ի տարածվածությունը մեծահասակների շրջանում ամենաբարձրն է Սահարայից հարավ ընկած տարածքում և կազմում է 5%:
Ընդհանուր առմամբ, աշխարհում ՄԻԱՎ-ի տարածվածության ցուցանիշը միջինում կազմում է 0,8%: Մեր տարածաշրջանում այս ցուցանիշը 0,9 է, իսկ Հայաստանում`ավելի քան 5 անգամ ցածր է և կազմում է ընդամենը 0,17%:
1988 թ. մինչ 2011 թ. դեկտեմբերի 1-ը ՀՀ քաղաքացիների շրջանում գրանցվել է ՄԻԱՎ վարակի 1136 դեպք, որոնցից 165-ը` ընթացիկ տարվա 11 ամիսների ընթացքում: ՄԻԱՎ վարակով հիվանդների ընդհանուր կազմում գերակշռում են արական սեռի ներկայացուցիչները`804 մարդ, իգական սեռի ներկայացուցիչների մոտ արձանագրվել է վարակի 332 դեպք: ՄԻԱՎ վարակի 22 դեպք է արձանագրվել երեխաների մոտ:
ՄԻԱՎ-ով վարակվածների 57%-ը 25-39 տարիքային խմբում է:
Հայաստանում ՄԻԱՎ վարակի փոխանցման հիմնական ուղիներն են հետերոսեքսուալ հարաբերությունների և թմրամիջոցների ներերակային օգտագործման միջոցով վարակումը: Սրանցից բացի, արձանագրվել են հոմոսեքսուալ ճանապարհով, մորից երեխային և արյան միջոցով ՄԻԱՎ վարակի փոխանցման դեպքեր:
ՄԻԱՎ վարակով հիվանդներից 543-ի մոտ ախտորոշվել է ՁԻԱՀ, ընդ որում՝ 94-ի մոտ 2010 թ. ընթացքում: Համաճարակի սկզբից գրանցվել է ՄԻԱՎ/ ՁԻԱՀ-ով հիվանդների մահվան 261 դեպք: Մահացածների թվում կան 44 կին և 5 երեխա:
Թմրամիջոցների ներերակային օգտագործման միջոցով բոլոր վարակվածները եղել են տղամարդիկ: Ընդ որում`նրանց մեծամասնությունը ժամանակավոր բնակվել և հավանաբար ՄԻԱՎ-ով վարակվել է ՌԴ-ում և Ուկրաինայում: Բացի այդ, ընդհանրապես ՄԻԱՎ վարակակիր տղամարդկանց մեծամասնությունը նույնպես թմրամիջոցների ներերակային ճանապարհով է վարակվել, իսկ գրեթե բոլոր կանայք՝ սեռական ճանապարհով:
ՄԻԱՎ վարակի դեպքերի առավելագույն թիվն արձանագրվել է մայրաքաղաք Երևանում`462 դեպք, որը կազմում է բոլոր գրանցվածների 40,7 տոկոսը: ՄԻԱՎ վարակի գրանցված դեպքերի թվով երկրորդ տեղում Շիրակի մարզն է: