Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին տեղեկացնում են, որ երևանցիների և մայրաքաղաքի հյուրերի համար արդեն 7-րդ անգամ ձմռան ամիսներին իր դռներն է բացել Կարապի լճի սահադաշտը: Երևանի միակ բացօթյա սահադաշտի 7-րդ տարեշրջանի բացումը նշանավորվել է մարզահամերգային գեղեցիկ ծրագրով, պատանի գեղասահորդների և հոկեիստների ցուցադրական ելույթներով ու հաճելի անակնկալներով:
Սահադաշտը գեղասահքի սիրահարների և պարզապես ակտիվ ժամանց նախընտրողների համար համապատասխան եղանակային պայմանների առկայության դեպքում կգործի ամեն օր՝ ժամը 11:00-ից 16:00-ը: Իսկ 16:00-ից – 18:00-ն սահադաշտում սառույցի մաքրման ու մշակման պրոֆիլակտիկ աշխատանքներ կկատարվեն, որից հետո այն կշարունակի աշխատել մինչև ժամը 23:00-ն:
Սահադաշտի տոմսի արժեքը չի փոխվել. սեփական չմուշկներով այցելության դեպքում այն 1 ժամի համար կարժենա 500, իսկ տեղում չմուշկներ ստանալու դեպքում՝ 1000 դրամ: Սահադաշտի մակերեսը 1033 քառ. մետր է: Այն կառուցված է նմանատիպ կառույցներին բնորոշ բոլոր չափանիշների պահպանմամբ և սահելու հնարավորություն է ընձեռում միաժամանակ 100 մարդու: Սահադաշտին կից գործում է հանդերձարան, չմուշկների վարձակալման կետ, նաև բուժկետ: Այստեղ կգործի սրճարան, ուր չմշկորդները կարող են տաք սուրճ և թեյ վայելել: Սահադաշտից օգտվելու համար տարիքային սահմանափակում չկա:
Սահադաշտի բացման հանդիսավոր արարողությունը եզրափակվել է տոնական շքեղ հրավառությամբ:
