Ադրբեջանական ANS PRESS-ի փոխանցմամբ՝ Կարմիր խաչի միջազգային կոմիտեն (ԿԽՄԿ) բանակցություններ է վարում Հայաստանի ու Ադրբեջանի իշխանական շրջանակների հետ՝ հստակեցնելու ղարաբաղյան պատերազմի ժամանակ ի հայտ եկած զանգվածային գերեզմանոցների գտնվելու վայրերը։ Այս մասին հայտարարել է ԿԽՄԿ-ի ադրբեջանական ներկայացուցչության ղեկավար Շերին Պոլինին։
Վերջինիս խոսքերով, բանակցություններում քննարկվում է զանգվածային կամ անհատական գերեզմանոցների գտնվելու վայրերի քարտեզի ստեղծման հարցը. «Սա շատ կարևոր հարց է, քանի որ զանգվածային թաղումներից անցել է ավելի քան 17 տարի։ Տեղական բնակչությունը նույնպես կարող է նպաստել այդ վայրերի ստույգ տեղը պարզելուն։ Քանի դեռ նրանք ողջ են, անհրաժեշտ է ստանալ այդ տեղեկատվությունը»։
Հիշեցնենք, որ ներկայիս դրությամբ, ԿԽՄԿ-ի՝ ղարաբաղյան հակամարտության անհետ կորածների ցանկում առկա է 4592 անուն։ Այդ նպատակով ԿԽՄԿ-ն 2012 թվականին նրանց հարազատներից վերցնելու է ԴՆԹ-ի նմուշներ։
Ի դեպ, կարծիքներ կան (քաղաքագետ Լևոն Մելիք-Շահնազարյան), թե Ադրբեջանի նախկին նախագահ Հեյդար Ալիևի ժամանակ ադրբեջանցի զինծառայողների համար ի հայտ եկան մի շարք «եղբայրական գերեզմանոցներ» (զանգվածային)։ Խոսքն Ալիևի հրահանգով 1993 թվականի ձմռանը սկսված զանգվածային ու անհեթեթ հարձակման մասին է, որի ժամանակ, հայկական կողմի հաշվարկներով, ադրբեջանական կողմի կորուստը կազմում է 22,000 զինծառայող։ Ադրբեջանի պաշտպանության նախարարության մամլո կենտրոնի ղեկավար Լեյլա Յունուսի տվյալներով, միայն Քարվաճառում (Քելբաջար) սպանվել է ավելի քան 5000 ադրբեջանցի զինծառայող։
Սակայն սպանված ադրբեջանցի զինծառայողների զգալի մասը հուղարկավորվել է ստեղծված «եղբայրական գերեզմանոցներում», որով նրանք հայտնվել են անհետ կորածների ցանկում, ինչն արվել է ադրբեջանական կողմի կրած խոշոր կորուստները թաքցնելու նպատակով։