Եվրամիությանն անդամակցության ճանապարհին Թուրքիայի կողմից կյանքի կոչվելիք պարտադիր բարեփոխումների շրջանակում Բարեփոխումներին հետեւող խումբը որոշել է «ավելի վաղ քաղաքացիությունից հանված անձանց վերադարձը քաղաքացիություն հեշտացնող քայլեր կատարել»:
Ինչպես գրել է Hurriyet-ը, կարգավորումները (հատկապես քաղաքացիությունը կորցրած կրոնական փոքրամասնություններին վերաբերող) ներառելու են նաեւ 1955 թ-ի սեպտեմբերի 6-7-ը Թուրքիայում բռնկված հակահայկական եւ հակահունական իրադարձություններից հետո երկրից հեռացած հայերին եւ հույներին, ինչպես նաեւ 1980 թ-ի սեպտեմբերի 12-ին տեղի ունեցած ռազմական հեղաշրջումից հետո երկիրը լքած մոտ 40 հազար անձանց:
Թուրքիայի` Եվրամիությանն անդամակցության բանակցություններում գլխավոր բանագնաց, պետնախարար Էգեմեն Բաղըշը այդ կապակցությամբ հայտարարել է, որ պատրաստվող օրենքի նախագիծն ընդունվելուց հետո հեշտացված կարգով քաղաքացիություն կշնորհվի Թուրքիայի այն բոլոր նախկին քաղաքացիներին, որոնց քաղաքացիությունը հանվել է ազգամիջյան բախումների եւ ռազմական հեղափոխությունների պատճառով երկրից հեռանալու համար:
