Грузия Online-ի փոխանցմամբ՝ Վաշինգտոնում «Հարավային Կովկասն անկախության ձեռք բերումից 20 տարի անց» խորագրով կոնֆերանսի ժամանակ Եվրոպայի և Եվրասիայի հարցերով ԱՄՆ փոխպետքարտուղարի օգնական Էրիկ Ռուբինը Վրաստանին ու Հայաստանին կոչ է արել անցկացնել ազատ, ժողովրդավարական ընտրություններ.
«ԱՄՆ-ն աշխատում է Վրաստանի ու Հայաստանի կառավարությունների հետ, քանի որ առաջիկայում այդ երկրներում սպասվում են ընտրություններ։ Վրաստանում և Հայաստանում սպասվող այդ ընտրությունները տվյալ երկրների համար մեծ հնարավորություն են՝ ի ցույց դնելու իրենց ժողովրդավարական զարգացման մակարդակը։ Ես գոհ եմ ժողովրդավարացման զարգացման ուղղությամբ Հարավային Կովկասի երկրների ձեռնարկած քայլերից»։
Հիշեցնենք, որ Ռուբինից առաջ էլ Հարավային Կովկասում և Կենտրոնական Ասիայում ՆԱՏՕ-ի հատուկ ներկայացուցիչ Ջեյմս Ափաթուրայը Երևանում ՆԱՏՕ-ի Տեղեկատվական կենտրոնի կազմակերպած տեսակամրջի ժամանակ հայտարարել էր, որ Վրաստանի և Հայաստանի համար շատ կարևոր է առաջիկա ընտրությունների արդար անցկացումը։
Վրաստանի հետ կապված՝ Ափաթուրայն ընդգծել էր, որ ՆԱՏՕ-ին Վրաստանի անդամակցությունը հիմնականում կախված է լինելու առաջիկա ընտրությունների արդար անցկացումից։