Տարածքային կառավարման նախարարության հասարակայնության հետ կապերի բաժնից «Առաջին լրատվական»-ին տեղեկացնում են, որ ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է Հայաստանում ՌԴ արտակարգ և լիազոր դեսպան Վյաչեսլավ Կովալենկոյին և «Ռոսսոտրուդնիչեստվո» դաշնային գործակալության հայաստանյան ներկայացուցչության ղեկավար Վիկտոր Կրիվոպուսկովին:
Փոխվարչապետը, անդրադառնալով օրերս ՌԴ տարածքային զարգացման նախարար Վիկտոր Բասարգինի հետ հանդիպմանը քննարկված հարցերին, նշել է, որ առաջիկայում երկկողմ աշխատանքներ են իրականացվելու հայ-ռուսական միջկառավարական հանձնաժողովի շրջանակում ստեղծված միջտարածաշրջանային համագործակցության հարցերով աշխատանքային խմբի 2012թ. օրակարգի ձևավորման ուղղությամբ:
Նախատեսվում է, որ խմբի գործունեության օրակարգում կլինեն ինչպես տարածաշրջանների միջեւ տնտեսական, այնպես էլ հումանիտար համագործակցության խնդիրները, նաև` առկա իրավապայմանագրային բազայի դյուրացման հարցերը:
Զրուցակիցները հաջողված են համարել ապրիլին Երևանում անցկացված Հայ-ռուսական միջտարածաշրջանային առաջին համաժողովը` ընդգծելով նման ձևաչափով հանդիպումների շարունակականության անհրաժեշտությունը, որը նպաստելու է երկու երկրների միջև ապակենտրոնացված համագործակցության զարգացմանը:
Քննարկվել են երկրորդ համաժողովի անցկացման հնարավորությունները և այն նախապատրաստելու հետ կապված հարցեր:
Այս համատեքստում պայմանավորվածություն է ձեռք բերվել 2012թ. առաջին կիսամյակում Հայաստանի մազպետարանների և ՌԴ տարածաշրջանների վարչակազմերի արտաքին տնտեսական համագործակցության հարցերով պատասխանատուների մասնակցությամբ կլոր սեղան-քննարկում կազմակերպելու վերաբերյալ` երկրորդ համաժողովի օրակարգի համար առաջարկություններ մշակելու նպատակով:
Մասնավորապես նշվել է, որ առավել մեծ ուշադրություն կդարձվի զբոսաշրջության, փոքր և միջին ձեռներեցության, հումանիտար ոլորտներում համագործակցության խնդիրներին:
Փոխվարչապետին տեղեկացվել է, որ միջտարածաշրջանային մակարդակով երկկողմ համագործակցության հարցերը գտնվում են «Ռոսսոտրուդնիչեստվո» դաշնային գործակալության հայաստանյան ներկայացուցչությունում համապատասխան համակարգող կենտրոնի ուշադրության ներքո, և անհրաժեշտ տեղեկատվություն է տրամադրվում Հայաստանի հետ համագործակցության հարցերով հետաքրքրվող սուբյեկտներին, ընկերություններին:
Պայմանավորվածություն է ձեռք բերվել նաև հայ-ռուսական միջտարածաշրջանային առաջին համաժողովի նյութերը հրատարակելու վերաբերյալ:
