ՀՀ-ում գրանցվել է 1136 ՄԻԱՎ վարակի դեպք, ընդ որում` 165-ը հայտնաբերվել է այս տարվա 11 ամիսների ընթացքում: Մասնագետների հավաստմամբ` վարակված մարդկանց շուրջ 70 տոկոսը հիվանդությունը ձեռք է բերել թմրամիջոցների, իսկ 30 տոկոսը` սեռական ճանապարհով:
Հայաստանում ՄԻԱՎ-ով վարակված հիվանդների թիվը գնալով աճում է (165 վարակված դեպք երբևէ գրանցված չի եղել), որին զուգահեռ ավելանում են նաև փողոցում թափառող թմրամոլներն ու մարմնավաճառ գիշերային թիթեռնիկները: Պարզ է, թե մարմնավաճառներն այսօր ում հետ են ակտիվորեն համագործակցում: Իսկ թե դրանցից քանիսն են հետազոտվել վերջին երկու ամիսների ընթացքում` միայն Աստծուն է հայտնի: Համենայնդեպս, մասնագետները ստույգ տվյալներ չունեն:
ՁԻԱՀ-ի կանխարգելման հանրապետական կենտրոնի համաճարակային վերահսկման բաժնի պետ Արշակ Պապոյանն անդրադառնալով թեմային` նշեց, որ վարակվածները հիմնականում 25-30 տարեկան տղամարդիկ են: Վարակված կանայք հիմնականում 20-29 տարեկան են, ովքեր չեն դրսևորում անվտանգ վարքագիծ, սակայն կանանց մեծ մասը վարակվում են ամուսիններից:
«Կան մարդիկ, ովքեր անգամ տեղյակ չեն, որ վարակված են: Դրա հիմնական պատճառներից մեկը չհետազոտվելն է. մեր հասարակությունը հիմնականում խուսափում է հետազոտվելուց»,- ընդգծեց բանախոսն ու հավելեց, որ վերջին շրջանում վարակակիրների թիվը գնալով աճում է:
«Համաճարակի սկզբում գրանցվել են անգամ մահացու դեպքեր (261 մահացու դեպք): Այս տարի դրանց թիվը հասնում է 30-ի: ՄԻԱՎ-ն ունի կլինիկական շրջան, որի բացահայտման դեպքում հնարավոր է նաև բուժում իրականացնել և մարդու կյանքը երկարացնել»:
Կյանքը երկարացնելու համար մասնագետները խորհուրդ են տալիս պարբերաբար հետազոտվել, վարել մաքսիմալ անվտանգ վարքագիծ, չօգտագործել միօրինակ ներարկիչներ: Իսկ մեր հասարակության մեջ, դժվար է ասել, արդյոք հնարավո՞ր է այդպիսի վարքագիծ դրսևորել` հանրապետությունում գնալով զարգացող պոռնկությանն ու թմրամոլությանը զուգահեռ: Իսկ ինչ ասեն այն անմեղ արարածները, որոնք դեռևս չեն ծնվել, բայց պարտավոր են կրել մեղքի բաժինը:
«Կանանց շրջանում մեծ տոկոս են կազմում հղիները: Մենք ամեն հնարավոր բան անում ենք, որպեսզի դեռ չծնված երեխայի կյանքը գոնե 90 տոկոսով ապահովենք, իսկ ինչ վերաբերում է հետազոտմանը, այն իրականացվում է անվճար սկզբունքով, մնում է միայն հետազոտվել»: