Ամոթալի և ցավալի է, որ Ազգային ժողովի ղեկավարությունը երեկ չկարողացավ կանխել և սաստել ՀՀԿ-ական պատգամավոր Առաքել Մովսիսյանի (Շմայսի) և «Ժառանգություն» կուսակցության պատգամավոր Արմեն Մարտիրոսյանի միջև հայտնի միջադեպը: Այս մասին այսօր կայացած ասուլիսում հայտարարեց ժառանգական պատգամավոր Ստեփան Սաֆարյանը:
«Եթե ՀՀԿ-ն քաղաքական խիզախություն ունենար, ներողություն կխնդրեր իր պատգամավորի համար, իսկ ԱԺ նախագահի պաշտոնակատար Սամվել Նիկոյանն էլ այնտեղ նստած էր ոչ թե որպես ՀՀԿ ներկայացուցիչ, այլ նիստը վարող: Ոմանք ակնկալում էին, որ երեկվա միջադեպից հետո «Ժառանգության» պատգամավորները պետք է ծեծեին ՀՀԿ-ական պատգամավորին, բայց խորհրդարանը խուլիգանանոց չէ, դրա համար էլ դիմեցինք Նիկոյանին` պարզելու, թե ինչպես է, որ խորհրդարանում նման դեպքեր կարող են տեղի ունենալ»,- նկատեց Սաֆարյանը:
Անդրադառնալով ԼՂՀ հակամարտության հարցին` «Ժառանգության» պատգամավորը ընդգծեց, որ ինքը անձամբ կողմնակից է Լեռնային Ղարաբաղի անկախացմանը:
«Եթե գտնում ենք, որ հարցը պետք է լուծվի միջազգային իրավունքի նորմերի հիման վրա, ապա, ուզենք թե ոչ, միակ լուծումը ժողովուրդների ինքնորոշման սկզբունքն է: Սա է խնդրի լուծման մեկնակետը: Այս առումով ԼՂՀ անկախությունը դառնում է Արցախի տունդարձի սկիզբը, սակայն ես վտանգ եմ տեսնում այն դիսկուրսներում, երբ ոմանք չեն խորշում Արցախը տեսնել Ադրբեջանի կազմում կամ ԼՂՀ հարցով ինչ-ինչ խոչընդոտներ ստեղծել»:
«Առհասարակ հայաստանյան հասարակությունը բաժանվում է երեք խմբի, որոնցից մեկը` չափազանց փոքր տոկոս կազմող, դեմ չէ, որ Ղարաբաղը Ադրբեջանին միանա, մյուս երկու մեծ խմբերը գտնում են, որ ԼՂՀ-ն պետք է անկախանա և տունդարձ կատարի` վերադառնալով Հայաստան»,- ամփոփեց պատգամավորը: