Բրիտանական խորհուրդը Հաշմանդամների միջազգային օրվա կապակցությամբ վաղը` դեկտեմբերի 2-ին The Club ակումբում կազմակերպում է «Չորս զգայարան» ինտերակտիվ միջոցառումը:
Միջոցառման նպատակն է բարձրացնել տեսողական խնդիրներ ունեցող մարդկանց հարցերի հանդեպ հասարակության իրազեկության մակարդակը, միջոցառումը հնարավորություն կտա զգալ շրջապատող միջավայրը ձայնի, համի, հոտի և շոշափելիքի միջոցով:
Քաղաքական, հասարակական ոլորտների ներկայացուցիչների և գործատուների համար կազմակերպվելու է գինու կույր համտեսում:
Քաղաքական, հասարակական ոլորտի ներկայացուցիչները և գործատուները Հաշմանդամների միջազգային օրվա կապակցությամբ կմասնակցեն գինու կույր համտեսմանը:
Ամբողջովին մութ սենյակում հյուրերին կմատուցվի գինի:
Հյուրերը հնարավորություն կունենան համտեսել գինին, լսել երաժշտություն, իսկ գինու բույրի և շոշափելիքի միջոցով կողմնորոշվել միջավայրում:
Հատուկ այս միջոցառման համար կնվագեն տեսողական խնդիրներ ունեցող երաժիշտները, իսկ գինին կմատուցեն հատուկ ակնոցներով զինված դերասանները:
Համտեսման ընթացքում դերասան-մատուցողները կստեղծեն իրավիճակներ, որոնց ընթացքում հյուրերը, օգտագործելով հինգ զգայարաններից չորսը, կզգան ու յուրովի կգնահատեն կույրերի աշխարհը, այսպիսով` հասկանալով նրանց խնդիրներն առօրյա կյանքում:
Գինու համտեսումից հետո հյուրերն արդեն լուսավոր սրահներում կքննարկեն կույրերի խնդիրները և կպատմեն, թե տվյալ իրավիճակում չորս զգայարանից որն էր առավել գերակշիռ մութ սենյակում:
Գործատուները միջոցառման ընթացքում տեղում կշփվեն տեսողական խնդիրներ ունեցող մարդկանց հետ և կքննարկեն իրենց կազմակերպություններում նրանց ներգրավելու հնարավորությունները:
Բրիտանական խորհուրդը որդեգրել է հավասար հնարավորությունների և բազմազանության քաղաքականություն, որն արգելում է խտրականության ցանկացած դրսևորում:
«Չորս զգայարան» ինտերակտիվ միջոցառումը կազմակերպվում է հավասարությանն ու բազմազանությանն ուղղված նախաձեռնությունների շրջանակում: