«Սլաք» ակումբի այսօրվա հյուրերն էին «Առավոտ» օրաթերթի գլխավոր խմբագիր Արամ Աբրահամյանը, «Ժամանակ» թերթի, «Առաջին լրատվական» կայքի գլխավոր խմբագիր Արման Բաբաջանյանը և Կենտրոն հեռուստաընկերության ներկայացուցիչ Պետրոս Ղազարյանը:
Քննարկման թեման էր` Ռուսաստանի գործոնը Հայաստանի քաղաքական գործընթացներում, լրատվամիջոցների դերակատարումը այդ քաղաքականության իրականացման գործում:
Արամ Աբրահամյանը կարևորեց Ռուսաստանի Պետդումայի ընտրությունները. «ՌԴ խորհրդարանում ճնշող մեծամասնությունը կլինի «Եդինայա Ռոսիան», իսկ ովքեր ընդդիմադիր են` մարգինալացված են և որևէ շանս չունեն: Հաղթող կուսակցությունը կլինի սուպեր կուսակցություն, Պուտինը` սուպեր նախագահ: ՌԴ ընտրությունները ինչ-որ առումով ազդեցություն կունենան, բայց պետք է հաշվի առնել, որ Հայաստանում ազդեցիկ ընդդիմադիր կուսակցություն կա»:
Արդոք Պուտի՞նը պետք է Հայաստանում նախագահ նշանակի` հարցրին լրագրողները: «Այդքան պրիմիտիվ պետք չէ ձևակերպել: Եթե նախագահ նույնիսկ Րաֆֆի Հովհաննիսյանը դառնա` ՌԴ-ն այնպես կանի, որ իր շահերին համահունչ քաղաքականություն վարի նաև Րաֆֆի Հովհաննիսյանը»,- նկատեց Ա. Աբրահամյանը:
Արման Բաբաջանյանը նկատեց. «Հայաստանի ԱԺ-ում այսօր չունենք պրոռուսական ընդգծված խումբ: Առավելապես ունենք արևմտյան վեկտորի պաշտպաններ: Որքան էլ տարօրինակ է` Հայաստանն այսօր հետխորհրդային միակ երկիրն է, որտեղ ընդդիմադիր մեծամասնությունը ընդգծված գնում է դեպի պրոռուսական ուղղություն, թեև նրանց մի մասը արևմտյան արժեքները դավանող է, բայց առայժմ դրանք նսեմացվում են: Եվ այն, ինչ այսօր կատարվում է Հայաստանում, ռուսաստանյան անհերքելի մասնակցությամբ է տեղի ունենում»:
Ըստ Պետրոս Ղազարյանի` Ռուսաստանում այսօր տեղի ունեցող բանավեճը բավական կրկնվող է. «Ռուսաստանում մարդիկ հասկանում են, որ այսպես շարունակվել չի կարող, բայց նաև գիտակցում են, որ այլընտրանք չկա: Ինչքան էլ քննադատեն Պուտինին, նրա գործոնը հզոր է, մենք նաև համացանցով ականատես դարձանք, թե ինչպես վերջերս սուլեցին Պուտինին: Բայց ակնհայտ է նաև, որ այլընտրանք չկա»:
Պետրոս Ղազարյանը նկատեց, որ թեև ռուսական եթերում պրոֆեսիոնալներ են աշխատում, միլիոնավոր հեռուստադիտողներ ունեն, բայց իրական դեբատ չի ստացվում: Բոլոր քաղաքական ուժերի նկատմամբ է ստեղծվելու ռուսական դաբրոյի PR-ը:
«Դա վկայում է այն մասին, որ Ռուսաստանը չունի իր թեկնածուն, և կաջակցեն նրան, ով այստեղ հաղթի»,- նկատեց Պ. Ղազարյանը:
«Մեր բոլոր ազդեցիկ կուսակցությունները բարեբախտաբար կամ-կամ մոդելից դուրս են եկել, քանի որ դա չաշխատող մոդել է»: