ՄԱԿ-ի Զարգացման ծրագրի շրջանակներում հրապարակված «Մարդկային ներուժի զարգացման ինդեքս-2011» զեկույցում ասվում է, որ կյանքի համար բարենպաստ պայմանների վարկանիշային աղյուսակում Հայաստանը զբաղեցնում է 86-րդ տեղը:
Ըստ զեկույցի` մարդկային ներուժի զարգացման ինդեքսը Հայաստանում կազմում է 0,716: Զեկույցում նշված է, որ 2011 թվականին կյանքի համար ամենաբարենպաստ երկիրը Նորվեգիան է, որը վերջին 11 տարիների ընթացում ութ անգամ գրավել է առաջին հորիզոնականը: Այնուհետև գալիս են Ավստրալիան, Նիդերլանդները, ԱՄՆ-ը և Նոր Զելանդիան:
Ադրբեջանը, որ հանդես է գալիս որպես աշխարհում տնտեսության ամենաարագ տեմպերով զարգացող երկիրը, զբաղեցրել է 91-րդ տեղը: Հայաստանն այս ցուցանիշով առաջ է անցել ոչ միայն Ադրբեջանից, այլև հարևան Իրանից և Թուրքիայից, որոնք գտնվում են համապատասխանաբար 88-րդ և 92-րդ տեղերում: Վրաստանը գտնվում է 75 հորիզոնականում:
Հիշեցնենք, որ «Մարդկային ներուժի զարգացման ինդեքսը» ինտեգրալ ցուցանիշ է, որը հաշվի է առնում այնպիսի գործոնները, ինչպիսիք են տարբեր երկրների բնակչության կյանքի և կրթության մակարդակները, մարդկանց երկարակեցությունը և նմանատիպ այլ ցուցանիշներ: