«Երիտասարդներին մեկ-մեկ թվում է, որովհետև ընդհանուր քաոս է տիրում, թե խորհրդային տարիներին գոնե ինչ-որ օրենքներ կային, կարգ ու կանոն կար, և նույնիսկ դրանով ավելի լավ էր: Ես ձեզ ասեմ` հիմա այդքան վատ է, որովետև մենք դեռ շարունակում ենք խորհրդային մտածելակերպով ապրել»,- այսօր մեկնարկած Կանանց համահայկական միության եւ Հելսինկյան քաղաքացիական ասամբլեայի Հայաստանյան կոմիտեի կողմից կազմակերպված սեմինար հանդիպում սեմինարի ժամանակ հայտարարել է ՀՀ առաջին նախագահ Լևոն Տեր-Պետրոսյանի կին Լյուդմիլա Տեր-Պետրոսյանը: Սեմինար հանդիպումն ունի «Կանանց դերը ներկա հասարակական եւ քաղաքական մարտահրավերների կոնտեքստում» խորագիրը: Լյուդմիլա Տեր-Պետրոսյանը նշել է, որ խորհրդային համակարգը կառուցված է եղել ստի վրա, մեր համակարգն էլի կառուցված է ստի վրա, որովհետև ամեն ինչ սուտ է, անգամ վիճակագրությունը: «Հիմա, երբ ասում են ընտանիքում կինը պետք է ազատագրվի, .. երևի խեղճ կինը միայն իր ընտանիքում ունի այդ «ազատությունը»: Մի հասարակության մեջ ինչո՞ւ պետք է կինը ազատ լինի, եթե տղամարդը ազատ չէ: Բոլոր եվրոպական ժողովուրդների պարագայում, ովքեր անցել են իրենց ճանապարհը, նախ ազատագրվել է տղամարդը, հետո` տղամարդիկ օգնել են կանանց ազատագրվել: Իսկ մեր երկրում տղամարդը, որ ոչ մի իրավունքներ չունի, չունի անգամ առաջին իրավունքը` աշխատել և պահել ընտանիքը, կինը այս պայմաններում ինչպե՞ս կարող է ազատ լինել: Եվ ընդհանրապես, այս երկրում ո՞վ կարող է ազատ լինել»,- հայտարարեց Լյուդմիլա Տեր-Պետրոսյանը: Առաջին նախագահի տիկինը նաև անդրադարձավ իշխանությունների հասարակությանն ուղղված այն կոչերին, թե «եկեք մի ընտանիքով պիտի ապրենք»: «Ի՞նչ ընտանիք, եթե իրական ընտանիքները հնարավորություն չունեն ապրելու: Սովետի ժամանակ ընկեր Ստալինը ժողովրդի հայրն էր, հիմա ընկեր Քոչարյանն ու Սարգսյանն են ցանկանում ազգի հայրը լինել: Ես իմ հայրը ունեցել եմ, ամեն մեկը իր լավ, թե վատ հայրը ունեցել է: Ընկերներ Սարգսյան և Քոչարյան, դուք ընդամենը պաշտոնյա եք, եթե ժողովուրդը ընտրել է ձեզ, ընդամենը հինգ տարի պետք է աշխատեք, և ամեն ինչ պիտի անեք, որ ժողովուրդը էլի ձեզ ձայն տա, որպեսզի դուք ստեղծագործեք: Չեք կարող, թողեք գնացեք, ուրիշները կգան»,- ասաց Լյուդմիլա Տեր-Պետրոսյանը: