Դեկտեմբերի 16-ին Ն.Ս.Օ. Տ.Տ. Գարեգին Բ Ծայրագույն պատրիարք և Ամենայն Հայոց կաթողիկոսն ընդունեց Հայաստանում Լատվիայի արտակարգ և լիազոր դեսպան Գինց Ապալսին:
Նորին Սրբությունը, ողջունելով նորանշանակ դեսպանին, արդյունավետ աշխատանք մաղթեց նրան երկու ժողովուրդների հարաբերությունների սերտացման գործում։ «Մեր ժողովուրդները թեև տարածքային առումով բավականին հեռու են, սակայն, լինելով հավատակից ժողովուրդներ և սնվելով քրիստոնեական մշակույթի նույն ակունքներից` ավելի են մերձենում և ամրանում բարեկամության մեջ»,- նշեց Վեհափառ Հայրապետը։
Հանդիպման ընթացքում անդրադարձ կատարվեց երկու երկրների հարաբերություններին, ինչպես նաև այն մտահոգություններին, որոնք ծառացած են ոչ միայն պետության, այլև եկեղեցու առջև բարոյական արժեքների պահպանման և ժողովրդի մեջ տարածման հարցում:
Հանդիպման ավարտից հետո մեծարգո դեսպանն այցելեց Մայր Աթոռի թանգարաններ և ծանոթացավ հայ ժողովրդի հոգևոր-մշակութային հարստություններին: